«Иссиқлик учун коммунал тўловлар ошмайди» – Франция компанияси Тошкентда иссиқлик тизимини ўзгартиришни бошлади

Франциянинг Veolia компанияси 2022 йилнинг июл ойидан бошлаб Тошкентдаги иссиқлик тизимини бошқара бошлади. Компания 3 ойлик иши давомида 1600 дан ортиқ носозликларни аниқлаб, бартараф этган. Veolia Тashkent масъуллари Kun.uz билан суҳбатда модернизациядан кейин коммунал тўловлар ошмаслиги, аксинча бир қанча яхшиланишлар кутилаётганини маълум қилди. Келгусида барча биноларнинг иситиш тизими алоҳида бўлади, иссиқ сув сифати яхшиланади ва қувурлар коррозияси камаяди. Мутахассислар иссиқлик энергиясининг бирлик харажатларини ҳам камайтирмоқчи.

Француз компанияси Тошкентда иссиқлик тизимини яхшилайди

2022 йил 1 июлдан Франциянинг Veolia компанияси Veolia Energy Tashkent МЧЖ шуъба компанияси орқали Тошкент шаҳрининг иссиқлик таъминоти тизимини бошқаришни бошлади. 2021 йил 29 сентябрдаги давлат-хусусий шериклик тўғрисидаги битимга биноан бошқарув 30 йил муддатга берилган.

Бу даврда компания пойтахтдаги иссиқлик инфратузилмасини янгилайди ва аҳолига иссиқлик етказиб беради.

Журналист ва блогерлар учун ташкил қилинган пресс-турда ўзгаришлар ва режалар ҳақида батафсил маълумот берилди.

Veolia Energy Tashkent бош директори Александр Хасти Kun.uz мухбири билан суҳбатда пойтахтдаги иссиқлик тизимининг 3 ойлик ўрганишдан кейинги хулосаларини айтар экан, модернизация ва тизимга киритилган инвестиция учун аҳолига иссиқлик тизими (иссиқ сув ва куз-қишда иситиш) коммунал тўловлар оширилмаслигини маълум қилди.

«Коммунал тўловлар ўтган йилги нархда ўзгаришсиз қолади. Келажакда биз нархлар ошишига ҳисса қўшиб келган тизимдаги йўқотишлар олдини оламиз ва харажатларни камайтиришга эришамиз.

Лойиҳанинг бошидан бошлаб биз тушундикки, тизимни модернизация қилиш ва уни яхшилаш инвестиция талаб қилади, шу сабабли бу харажатлар субсидиялар орқали қопланади», – деди у.

Компания томонидан берилган маълумотларга кўра, тарифлар кескин ошиб кетишининг олдини олиш мақсадида аҳолига пасайтирилган тарифларни қўллаш ва кўриладиган зарарларни қоплаш учун Тошкент шаҳар бюджетидан 2021-2027 йилларда 8,4 трлн сўм субсидия ажратилади.

Шунингдек, Александр Хасти тизимдаги камчиликлар даражаси 50 фоизга етишини таъкидлади. 

«Бу тизим самарасизлигини англатади. Етказиб берилаётган иссиқлик етарли даражада юқори эмас, натижада кўплаб хонадонлар иссиқлик борасида ноқулайликларга учрайди. Уларга иссиқлик етиб келгунича кутишига тўғри келади. Чунки биноларга иссиқлик етиб боргунча йўлда йўқотишларга учрайди, бунинг сабаби эса тизим жуда суст ишлашида. Лойиҳа давомида бу камчиликлар бартараф этилади. Аммо улар бир йилда ечиладиган муаммолар эмас», – деди у. 

Унинг сўзларига кўра, бошқа давлатлар билан солиштирганда бир ҳафтадаги тизимдаги авариялар бошқа давлатлардаги бир йиллик аварияларга тенг ва бу жуда ҳам хавотирли.

Компания мутахассислари томонидан 20 та энг йирик қозонхонада инфратузилмадаги нуқсонларни аниқлаш бўйича дастлабки аудит ўтказилган. Тошкент шаҳридаги қолган қозонхоналарни текшириш ишлари давом этмоқда.

«Аудит шуни кўрсатдики, кенг кўламли такомиллаштиришни талаб қиладиган фавқулодда ҳолатдаги қисмлар – бу инфратузилманинг айни ҳолатидир. Иссиқлик тармоқлари ва жиҳозларининг салмоқли қисми жорий ва капитал таъмирга муҳтож. Бирданига бутун инфратузилмани алмаштириб, мавжуд муаммоларни ҳал қилиш эса имконсиз.

Veolia Energy Tashkent эскирган қувурларни алмаштириш, бутун иссиқлик таъминоти тизимини модернизация қилиш бўйича ишларни амалга оширмоқда. Уч ой ичида биз 100 дан ортиқ ҳудудда иссиқлик тармоқларини кўчиришни якунладик, шунингдек, қувурлар деформациясининг олдини олувчи мингдан ортиқ компенсаторларни таъмирладик ва алмаштирдик», – дея изоҳ берди Veolia Energy Tashkent компаниясининг операцион масалалар бўйича директори Лауринас Рариванас.

Пресс-турнинг иккинчи қисмида ОАВ ходимлари компания томонидан таъмирланадиган йирик объектлардан бири – Мирзо Улуғбек туманида жойлашган иссиқлик марказларидан бирида бўлди. Марказда 405 та катта бино бор, шулардан 300 хонадонга иссиқлик етказиб берилади. Икки ой ичида аудит ўтказилган. Марказ электр энергия ва газдан тежамкор фойдаланиш технологиясига ўтказилади.

Мирзо Улуғбек туманининг деярли ярмини иссиқлик билан таъминловчи қозонхона ўтган асрнинг 80-йилларида қурилган. Инфратузилма эскирган, бошқарув тизими ҳам эски технологиялар билан амалга оширилади. Келгусида Veolia Energy Tashkent компанияси бу ерда модернизация ишларини олиб боради.

Мадина Очилова тайёрлади