Сир эмаски, дунёда энг қимматбаҳо маҳсулот, тараққиётни ҳаракатлантирувчи куч ёки иқтисодиётни ривожлантирувчи драйвер ҳам сўзсиз бу илм, билим ва фандир. Агарда интеллекутуал фаоллик бўлмаса, фундаментал ўзгаришларга эришиш ва стратегик марраларни забт этишнинг ҳеч ҳам имкони йўқ. Сўнгги йилларда мамлакатимизда олиб борилаётган сезиларли ислоҳотлар фонида айни шу қатъий тамойил акс этади. Бу йўлда янгича фикрлайдиган, глобал даврнинг замонавий чақириқларига мос, жаҳон трендидаги илмларни чуқур ўзлаштирган алфа авлодни тарбиялаш давлатимиз раҳбарининг энг олий мақсадларидан биридир.
Албатта, бунда ёшларни ҳар томонлама қўллаб-қувватлаб, уларга шароит ва имкониятлар яратиш, ғоя ҳамда ташаббусларини тинглаш муҳим саналади. Умумий персоналнинг қарийб 33 фоизини навқирон ўғил-қизлар эгаллаган “Туронбанк” АТБда бу борада ноодатий тизим ва яхши тажриба шаклланган. Яъни молия ва иқтисодиёт йўналишида таҳсил олаётган иқтидорли талабаларни ўқиш вақтидаёқ амалиётга жалб этиб, ўзаро кооперацияни йўлга қўйиш орқали салоҳиятли кадрлар захирасини яратиш бўйича таълим кластерини ташкил этиш.
Мазкур саъй-ҳаракатларнинг мантиқий давоми сифатида бу йилдан жорий этилган “Туронбанк стипендияси” лойиҳасини ҳам келтириш мумкин. Ушбу мотивацион ғоянинг аҳамияти шундаки, унинг доирасида энг иқтидорли ва ўз билими билан ОТМга юқори балл тўплаб қабул қилинган ёшлар қамраб олинади. Мақсад эса фаол илм-фан эгаларини рағбатлантириш. Ҳозирнинг ўзидаёқ бутун республика миқёсидан 100 нафар стипендиат танлаб олинган ва уларга махсус сертификатлар ҳам топширилди. Энг муҳими, тўлов – контракт асосида қабул қилинган талабаларнинг кўпчилигига тўлиқ ўқиш даври учун контракт пуллари ҳам тўлаб берилиши таъминланди. Шунингдек, улар таълимнинг 3-босқичидан бошлаб, “Туронбанк”да амалиёт ўташлари ва аниқ ишга жалб этилишлари мумкин.
