Тошкентнинг Чилонзор тумани Кўтарма маҳалласи 1-, 3-, 9- ва 39- уйлар оралиғидаги ҳудудда тадбиркор кўп қаватли турар жой қурмоқчилиги, аммо фуқаролар бундан норози эканлиги ҳақида хабар берилганди. Ушбу 15 сотих ер майдони Тошкент шаҳар ҳокимининг 2020 йил 9 декабрдаги 1147-сонли қарори асосида фуқаро Мирҳамид Мирходжаевга компенсация тариқасида доимий фойдаланиш ҳуқуқи билан кўп қаватли турар жой қуриш учун ажратилган.
Ҳолат бўйича Чилонзор туман ҳокимлигида ишчи гуруҳ тузилиб, мазкур ҳудудда ўрганиш ишлари олиб борилди. 8 ноябр куни туман ҳокими, мутасаддилар, Қонунчилик палатаси депутати, фуқаролар ва тадбиркор иштирокида учрашув ўтказилди. Унда тадбиркор қўлида керакли ҳужжатлари борлигини, лекин мутасаддилар томонидан қурилишга рухсат берилмаётганига тушунмаётганини билдирди.
“Ўрганишлар натижасида шуни билдикки, 2008 йилда мазкур ҳудудда кўп қаватли турар жой биноси қурилиши режалаштирилган экан. Ўша йилги архив ҳужжатлари буни тасдиқлаб турибди. Тегишли ташкилотлар мутасаддилари билан келишиб, рухсатлар олиниб, қурилиш ишларини бошлагани келдик. Майдонда феврал ойида дарахтлар экилган. Биз уларни кўчириш учун келганимиздан кейин фуқароларда норозилик келиб чиқди. Шаҳарсозлик норматив ҳужжатларига асосан биномиз ён атрофдаги “дом”лардан 40-45 метр узоқликда жойлашади. Турар жойимиз 8 қават ва унинг мансардаси ҳам бор. Вакилимиз томонидан атрофда яшовчиларга тушунтириш ишлари олиб борилиб, уларнинг розилик хатлари олинган”, — дейди тадбиркор.
Учрашувда таъкидланганидек, 1-, 3- ва 9-уйларда яшовчи фуқаролар ушбу ҳудудда болалар ва спорт майдончаси, қариялар дам олиши учун шийпон, автотураргоҳ қуриш шарти билан қурилиш олиб борилишига розилик билдиришган. Бу ҳақда маҳалла фуқаролар йиғинининг баённомаси ҳам расмийлаштирилган. Фуқаролар эса “Max Building Project” МЧЖ бу ерда бино қурмоқчи эканидан умуман хабари йўқлиги, розилик имзоси ҳақиқий эмаслигини айтишмоқда.
