Қамчиқ довонидаги постларда «яшил» ва «қизил йўлак» 1 декабрдан ишга тушади

Ҳеч қандай қоидабузарлик содир этмаган ҳайдовчилар «Яшил йўлак» орқали ўз машинасида чекловларсиз ҳаракат қилса, «Қизил йўлак»ка қидирувда бўлган ёки сўндирилмаган жаримаси бўлган ҳайдовчилар ҳолатни аниқлаштириш мақсадида киритилади.

Оҳангарон туманидаги «Чинор» ЙПХ стационар пости яқинидаги автотранспорт воситаларини йўлакларга йўналтирувчи электрон табло / Фото: Kun.uz

Автотранспорт воситаларининг «яшил» ва «қизил» йўлак тамойили асосида ҳаракатланиш тартиби 2022 йил 1 декабрдан бошлаб Тошкент вилояти Оҳангарон туманида жойлашган «Чинор» ЙПХ ва Наманган вилояти Поп туманида жойлашган «Наманган» ЙПХ стационар постларида жорий этилади.

Бунда постга яқинлашган автотранспорт воситасининг давлат рақами электрон таблоларда акс эттирилиб, қайси йўлак орқали ҳаракатланиши автоматик тарзда кўрсатиб борилади.

Ўзбекистон Республикаси Вазирлар Маҳкамасининг 2022 йил 8 июлдаги «Йўл ҳаракати хавфсизлигини таъминлаш соҳасига замонавий ахборот технологияларини кенг жорий этиш бўйича қўшимча чора-тадбирлар тўғрисида»ги 377-сонли қарорига кўра, йўл-патруль хизмати стационар постларида ташкил этиладиган:

«Яшил» йўлакдан — белгиланган қоидаларга риоя этадиган ва ҳуқуқбузарлик содир этмаган транспорт воситалари ҳайдовчилари ҳеч қандай тўсиқсиз ва чекловларсиз ҳаракатланади;

«Қизил» йўлакдан — қидирувда бўлган, суғурта полисининг муддати ўтган, белгиланган муддатда техник кўрикдан ўтмаган, вазн ва ҳажм параметрларини бузиб ҳаракатланаётган ёки йўл ҳаракати қоидаларини бузганлик учун ўз вақтида тўланмаган жаримаси мавжуд бўлган транспорт воситалари ҳаракатланади.

Вазирлар Маҳкамаси қарорига кўра, биринчи босқичда Қамчиқ довонидаги иккита стационар постда «яшил» ва «қизил» йўлак ишга тушади.

Иккинчи босқичда 2023 йилнинг июл ойигача Андижон, Тошкент вилоятлари, Тошкент шаҳрига киришдаги стационар постлар; учинчи босқичда 2024 йилнинг феврал ойига қадар Сирдарё, Наманган, Жиззах ва Самарқанд вилоятидаги стационар постлар; 4-босқичда 2024 йилнинг июл ойига қадар Қашқадарё ва Сурхондарё вилоятидаги стационар постлар; 5-босқичда 2025 йилнинг февралига қадар Бухоро ва Навоий вилоятидаги стационар постлар; 6-босқичда 2025 йилнинг июлига қадар Хоразм вилояти ва Қорақалпоғистон Республикасидаги стацион постларда ҳам «яшил» ва «қизил» йўлаклар ишга туширилади.

#Қамчиқ довони #яшил йўлак