У АҚШ ва Хитой ўртасида Тайван учун жанг бўлиши мумкин, деб ҳисобламоқда.
АҚШ Ҳарбий-ҳаво кучлари қўмондонлиги раҳбари генерал Майк Миниҳан сўзларига кўра, Хитой ва АҚШ ўртасида Тайван учун уруш 2025 йилда бошланиши мумкин. Бу ҳақда у қўл остидагиларга юборилган хизмат хатида ёзган, деб хабар берди NBC News.
«Хато қилаётганимга умидворман, аммо 2025 йилда жанг қилишимиз мумкинлигини сезяпман», дейди генерал ўз хабарида. Майк Миниҳан 2024 йилда АҚШда ҳам, Тайванда ҳам президентлик сайлови ўтказилишини ва Хитой раҳбари Си Жинпинг бундан фойдаланиб Тайванни эгаллашга ҳаракат қилиши мумкинлигини таъкидлаган.
Генерал ўз аскарларига 28 февралгача Хитой билан жангга тайёргарлик кўриш билан боғлиқ барча муҳим тадбирлар ҳақида ҳисобот беришни буюрган. Офицерларга март ойида «ўз шахсий ишларини тартибга солиш» ва ҳуқуқий муаммоларни ҳал қилиш тавсия этилган.
Ҳарбий-ҳаво кучлари қўмондонлиги вакили мактубнинг ҳақиқийлигини тасдиқлади. Унинг таъкидлашича, генералнинг буйруғи 2022 йилдаёқ бошланган жараёндан келиб чиқади. Унда «агар тийиб туриш иш бермаса, тўқнашув юз бериши мумкинлиги» қайд қилинган.
АҚШ Мудофаа вазирлиги матбуот котиби, ўз навбатида, Майк Миниҳан сўзлари «идоранинг Хитойга нисбатан нуқтаи назарини акс эттирмаслигини» ва Пентагон Ҳинд-Тинч океани минтақасини «тинч, эркин ва очиқ» сақлаш тарафдори эканини айтди.
Хитой Тайванни ўзининг ажралмас қисми деб билади, аммо Пекин фуқаролар уруши тугаганидан ва 1949 йилда ХХР тузилганидан бери оролни амалда назорат қилмайди.
2022 йил августида Хитой расмийлари Пекин Тайван билан «тинч йўл орқали бирлашиш учун кенг майдон яратишга тайёрлигини» ва оролни қўлга олиш учун куч ишлатиш «бошқа ҳеч қандай имконият бўлмаган вазиятда охирги чора сифатида» кўрилиши мумкинлигини маълум қилган эди.
