АҚШ Векселбергнинг дўстини санкцияларни четлаб ўтишга ёрдам берганликда айблади

7 февраль, сешанба куни Вашингтондаги Адлия вазирлигининг маълум қилишича, АҚШ расмийлари Россия фуқароси Владимир Воронченкога бизнесмен Виктор Векселбергга АҚШ санкцияларидан қочишда ёрдам берганликда айблов қўйган.

Нью-Йорк федерал судида эълон қилинган айблов хулосасига кўра, АҚШда яшаш учун рухсатномага эга бўлган 70 ёшли Воронченко Векселбергга тегишли бўлган, АҚШда жойлашган тўртта кўчмас мулк объектига хизмат кўрсатиш учун 4 млн доллар ўтказиб беришда, шунингдек, улардан иккитасини сотишга уринишда иштирок этган. Бундан ташқари, россиялик 2022 йил май ойида, кўрсатма бериш учун шахсан келишини талаб қилган катта ҳакамлар ҳайъатидан чақирувчи қоғози олганидан сўнг Қўшма Штатлардан қочиб кетгани сабабли судга ҳурматсизликда айбланяпти.

Турли вақтларда Нью-Йорк, Флорида ва Россияда яшаган Воронченко ўзини муваффақиятли тадбиркор, коллекционер ва санъат асарлари сотувчиси, шунингдек, Векселбергнинг яқин дўсти ва бизнес шериги сифатида кўрсатган.

Миллиардер Виктор Векселберг Россия президенти Владимир Путиннинг яқин атрофидаги шахс саналади. Тадбиркор металлургия, тоғ-кон саноати, технология ва бошқа активларни ўз ичига олган Москвадаги Renova Group конгломератига раҳбарлик қилади.

У 2018 йилнинг апрелида Россиянинг АҚШ сайловларига аралашувига алоқадорликда гумон қилиниб, АҚШ санкциялари рўйхатига киритилган эди. Россиянинг Украинада ҳарбий ҳаракатлари бошланганидан сўнг, Қўшма Штатлар Векселбергга қўшимча чекловлар киритиб, унинг активлари, жумладан, Tango яхтаси ва Airbus А319 самолётини хатловга олди.

Жорий йилнинг январь ойида АҚШ ҳукумати икки тадбиркорни - Россия ва Швейцария фуқаролигига эга 51 ёшли Владислав Осипов ҳамда 52 ёшли британиялик Ричард Мастерсни Векселбергнинг Tango яхтасини санкциялардан олиб чиқишга уринишда айблаган эди.