Украинада урушнинг 353-куни ўтди. Асосий маълумотлар:

  • «Комсомольская правда» журналисти Владимир Романенко нашр сайтида урушга қарши материаллар жойлаштирди. Романенко ҳукуматни танқид қилувчи матнларни уруш бошланганининг бир йиллиги муносабати билан эълон қилганини айтган ва ўз ҳаракатини «айбни ювиш» деб атаган. Материаллар сайтдан зудлик билан ўчириб юборилган.
  • Украина қуролли кучлари бош қўмондони Валерий Залужний Россия қўшини уруш бошидан буён илк бор дронларнинг янги типини қўллагани ҳақида айтди — бу денгизда сув юзасида ҳаракатланувчи аппаратлар. Аввалроқ Россия тарафдори бўлган ҳарбий телеграм-каналлар бундай қайиқ-дронлар Одесса областидаги Затоке кўпригига ҳужум қилгани акс этган видеони тарқатганди.
  • Путин Қрим кўпригидаги ёнғинни ўчиришда қатнашган ўт ўчирувчилар ҳамда портлаш вақтида Керч бўғозидаги кўприк бўйлаб ҳаракатланган юк поезди машинистларини орден ва медаллар билан тақдирлади.
  • Украина хавфсизлик хизмати РФ Тергов қўмитаси раҳбари Александр Бастрикинга сиртдан айблов эълон қилди. УХХ версиясига кўра, Бастрикин Россиянинг қуролли тажовузи ва Украина жануби ҳамда шарқидаги областлар ҳудудларини эгаллаб олишини ошкора оқлаган, шунингдек босиб олинган ҳудудларда қатағонлар уюштирилишига ҳисса қўшган.
  • Белгород области раҳбари Украина билан чегарадош районлардаги аҳоли яшаш манзиллари ўққа тутилгани, Шебекино шаҳрида уч киши жабрланганини маълум қилди. Курск области раҳбари Суджанский районидаги Гуево қишлоғига зарбалар келиши оқибатида бир киши ҳалок бўлиб, бир киши яралангани ҳақида хабар берган.

Кун кадри. Вуҳледар атрофида яксон этилган Россия зирҳли техникалари колоннаси 

Суратдаги ҳолат 2023 йил февралида Украина армияси томонидан тасвирга олинган — аниқ сана кўрсатилмаган. Украин ҳарбийларининг тасдиқлашича, фотосуратда Россиянинг яксон этилган ва шикастланган танклари акс этган — колонна Вуҳледарга ҳужум қилишга уриниш чоғида зарбага учраган.
Ukrainian Armed Forces / AP / Scanpix / LETA

9 феврал куни Украинадаги қатор телеграм-каналлар, шунингдек «Вагнер» ХҲК билан алоқадор ҳисобланган Grey Zone канали Донецкдан 60 километр жануби-шарқда жойлашган Вуҳледар (Угледар) шаҳрида Россия техникалари колоннаси яксон этилганини хабар қилди. Кейинроқ бу маълумотни OSINT мустақил тадқиқотчилари тасдиқлади. Роб Ли 31 дона зирҳли техникалар, жумладан 15 танк (улар орасида Т-72Б3 ва Т-80БВМ танклари ҳам бор) яксон этилгани ҳақида маълум қилган. «ДХР»нинг собиқ мудофаа вазири Игор Стрелков ҳам РФ қуролли кучлари Вуҳледар атрофида қақшатқич зарбага учраганини айтди — унинг сўзларига кўра, россиялик ҳарбийлар 30 дан ортиқ зирҳли техникани йўқотган, «бир неча ўнлаб» танкчилар ҳалок бўлган.