АҚШ президенти Жо Байден 24 феврал куни ABC телеканалига берган интервюсида Хитой Россияга ҳарбий қуроллар етказиб беришини «кутмаётгани»ни айтди, аммо агар барибир бу содир бўладиган бўлса, Вашингтон томонидан «жавоб» қайтарилишини ваъда қилди. «Биз бу чегарани кесиб ўтганларнинг ҳар бирига жиддий санкциялар қўллаймиз», — деди Байден.
Журналистнинг саволи Кремль Пекин билан Россия армияси учун камикадзе дронлар етказиб бериш масаласида музокаралар бошлагани тўғрисидаги хабарлар фонида берилган. Британия разведкаси хабарига кўра, Россияда Эрон томонидан ишлаб чиқарилган учувчисиз учиш қурилмалари захиралари тугаб бормоқда. Разведка 15 феврал кунидан кейин Россия Украинада дронлар орқали ҳужум қилгани тўғрисида хабарлар келмаётганига асосланиб шундай хулосага келган.
19 феврал куни АҚШ давлат котиби Энтони Блинкен NBC телеканалига берган интервюсида Мюнхен конференцияси доирасида ХХР дипломатияси раҳбари Ван И билан учрашув чоғида Хитойнинг Россияга қурол етказиб бериши мумкинлиги бўйича масалани кўтарганини айтган. Хитой томони бу интервюдан кейин америкалик дипломатларни «дезинформация тарқатиш»да айблади.
Бир неча кун ўтиб Politico нашри АҚШ Пекинга биргаликда босим ўтказиш мақсадида иттифоқчилар билан Хитойнинг Россияга эҳтимолий ёрдами бўйича маълумот алмашгани ҳақида хабар берди. Кейинроқ немисларнинг Der Spiegel журнали гап 30 килограммдан 50 килограммгача бўлган жанговар каллакни олиб юришга қодир бўлган ZT-180 камикадзе дронлари ҳақида кетаётган бўлиши мумкинлигини ёзиб чиқди. Хабарда айтилишича, Хитой компанияси бундай қурилмаларни Россия қўшинларига апрел ойигача етказиб беришга рози бўлган. Кейинги қадам эса керакли қисмлар ва технологиялар етказиб бериш бўлиши мумкин, бундай ёрдам эвазига РФ ўзи ойига шу каби 100 та дрон ишлаб чиқариши мумкин бўлади. Бундан ташқари, Хитойдаги ишлаб чиқарувчи Су-27 самолётларини таъмирлаш учун зарур бўлган эҳтиёт қисмлар тақдим этишга тайёрлиги айтилган.
