Шольц Украинадаги уруш яқин орада тугашига ишонмаяпти

Шольцга кўра, Украинадаги уруш узоқ давом этиши мумкин, Россия қўшинлари олиб чиқилмай туриб, тинчлик ўрнатиб бўлмайди.

Фото: Reuters

Германия канцлери Олаф Шольц Россиянинг Украинага бостириб кириши тез орада тугашини кутмаяпти, чунки Россия қўшинлари олиб чиқилмасдан тинчлик ўрнатиб бўлмайди. Бу ҳақда Германия ҳукумати раҳбари Rheinische Post газетаси томонидан 20 март, душанба куни ташкил этилган тадбирда айтиб ўтди.

«Биз бу уруш узоқ вақт талаб қилиши мумкинлигига тайёр бўлишимиз керак», деди Шольц. «Уруш тугагач ҳам, ҳамма нарса дарҳол нормал ҳолатга қайтмайди. Лекин биз ҳам уни тугатиш учун ҳаракатларимизни тўхтатмаслигимиз керак», деб қўшимча қилди канцлер.

Шольц, шунингдек, режимни ташқи куч ишлатиш орқали ўзгартириш тушунчасига ишонмаслигини айтди. Канцлернинг сўзларига кўра, АҚШ президенти Жо Байден унга Оқ уй бундай вариантни кўриб чиқмаётганини айтган. «Мен Америка президентини бу ғояда қўллаб-қувватлайман», деб таъкидлади Шольц.

Россия Украинада тинчлик ўрнатиш шартларини белгилаб бера олмайди, деди Шольц. «Украина ўз яхлитлиги ва мустақиллигини ҳимоя қила олиши керак», деди у ва Россия қўшинлари олиб чиқилмасдан туриб, Россия ва Украина ўртасида тинчлик ўрнатиш имкониятини кўрмаслигини таъкидлади.

«Россия президенти Владимир Путин урушда ғалаба қозонмаслиги керак. Чегаралар куч билан бузилмаслиги керак», - деди Шольц ҳамда уруш тугаганидан кейин ҳам унинг оқибатлари узоқ вақт давомида сезилишини, Украина узоқ вақт тикланишга муҳтож бўлишини қўшимча қилди.