23 мартга ўтар кечаси Ўзбекистоннинг қатор ҳудудларида яна ер силкиниши кузатилди.
ФВВ Сейсмопрогностик мониторинг Республика маркази хабар қилишича, Тошкент вақти билан соат 01:07 да Тожикистонда зилзила содир бўлди. Зилзила координаталари: 39,39 градус шимолий кенглик; 69,93 градус шарқий узунлик. Магнитуда М=6. Чуқурлик 15 км. Зилзила эпимаркази Тошкентдан 217 км жанубий-шарқда.
Ўзбекистон Республикаси ҳудудида сезилиш кучи:
- Сирдарё вилоятида 5 балл, 157 км
- Фарғона вилоятида 5 балл, 192 км
- Жиззах вилоятида 5 балл, 198 км
- Тошкент шаҳрида 5 балл, 217 км
- Наманган вилоятида 4-5 балл, 232 км
- Самарқанд вилоятида 4-5 балл, 256 км
- Андижон вилоятида 4-5 балл, 257 км
- Сурхандарё вилоятида 4 балл, 335 км
- Қашқадарё вилоятида 4 балл, 363 км
- Навоий вилоятида 4 балл, 398 км
- Бухоро вилоятида 4 балл, 474 км.
UPD: Тошкент вақти билан соат 01:36 да Тожикистонда 3,9 балли иккинчи зилзила (афтершок) содир бўлди. Зилзила эпимаркази Тошкентдан 215 км жанубий-шарқда.
Эслатиб ўтамиз, 21 март куни, Тошкент вақти билан соат 21:47 да Афғонистонда рўй берган 6,6 балли зилзила Ўзбекистоннинг барча ҳудудларида сезилган, Тошкент шаҳрида ер силкиниши кучи 5 баллни, Сурхондарё вилоятида 6 баллни ташкил этганди.
Маълумот учун, Ўзбекистон ҳудудида бунга қадар энг кучли зилзила 2011 йил 20 июлига ўтар кечаси, соат 01:35 да рўй берган, Ўзбекистон ва Қирғизистон чегарасида 6,2 баллдан 7 баллгача баҳоланган ер силкиниши оқибатида 13 киши ҳалок бўлиб, 86 киши тан жароҳати олганди.
Минтақада сўнгги энг кучли зилзила 2008 йил 5 октябрида, соат 21:52 да Қирғизистон жанубида рўй берган, ўшанда қарийб 8 балли зилзила оқибатида 70 дан ортиқ киши вафот этган, юздан ортиқ киши тан жароҳати олган, 144 бино вайрон бўлган.
