Буюк Британия мудофаа вазири ўринбосари баронесса Аннабел Голди Лондон Украинага ядролари кучсизлантирилган уранли артиллерия снарядларини юбораётганини тасдиқлади.
Бу баёнот Россия расмийлари, жумладан, президент Владимир Путиннинг ўта кескин реакциясига сабаб бўлди. Аммо украиналик ва россиялик қуролли кучлар бўйича экспертлар бундай ўқ-дорилар Россияда ҳам ишлаб чиқарилишини айтмоқда.
«Украинани Chellenjer-2 асосий жанговар танклари билан таъминлаш билан бир қаторда, биз ўқ-дорилар, жумладан, таркибида кучсизлантирилган уран бўлган зирҳни тешувчи снарядларни ҳам Киевга етказиб берамиз», деган Голди ҳамкасбларидан бирининг парламент сўровига жавобан.
«Бундай снарядлар замонавий танклар ва зирҳли техникаларга қарши юқори самарадорликка эга», дея қўшимча қилган у.
Россия расмийлари бу янгиликка очиқча ғазаб билан муносабатда бўлди ва бу қадамга қандай жавоб беришни жиддий ўйлаб кўриш билан таҳдид қилди.
Кучсизлантирилган уран нима ўзи?
Кучсизлантирилган уран бойитилган уран ишлаб чиқаришдаги қўшимча маҳсулотдир.
Кучсизлантирилган уран ўзининг юқори зичлиги ва мустаҳкамлиги билан ажралиб туради ва шу хусусиятлари сабаб ҳарбий техника учун зирҳ ишлаб чиқаришда ҳам, ўқ-дорилар ишлаб чиқаришда (зирҳ тешувчи ракеталарнинг асоси сифатида) ҳам ишлатилади.
Бундай уран гарчи заҳарли ва канцероген (зарарли ўсимталар пайдо қилувчи) ҳисобланса-да, жуда юқори радиоактивликка эга эмас.
Европа Иттифоқи сайтида айтилишича, кучсизлантирилган уранли ўқ-дорилар Форс кўрфази урушларида, шунингдек, Сербия ва Косовода қўлланган. Улардан фойдаланиш майдаланган уран таъсиридан келиб чиқадиган соғлиқ учун жиддий хавфлар сабаб ташвишлар уйғотган. Европа Иттифоқи веб-сайтида таъкидланишича, бир неча тадқиқотлар давомида модданинг зарарли эканига етарли далиллар топилмаган, аммо мутахассисларнинг хулосалари турлича талқин қилинган.
Ўз навбатида, АҚШ атроф-муҳитни муҳофаза қилиш агентлиги веб-сайтида айтилишича, кучсизлантирилган уран танага кириб кетса, жуда хавфлидир.
