Молдовада россияпараст «Шор» партияси раҳбари 15 йилга қамалди

Молдова пойтахти Кишинёв суди қочоқ тадбиркор ва россияпараст мухолифатдаги «Шор» партияси етакчиси Илан Шорни сиртдан 15 йиллик қамоқ жазосига ҳукм қилди, деб хабар берди Молдова президенти Майя Санду пайшанба, 13 апрель куни ўзининг Facebook’даги саҳифасида. «Илан Шор миллиардни ўғирлагани учун 15 йил қамоқда ўтади ва унинг мол-мулки мусодара қилинади, Апелляция суди шундай қарор қилди», деб ёзади у.

Ҳукмни Кишинёв апелляция суди ҳам тасдиқлаган. «Шор 15 йиллик қамоқ жазосига ҳукм қилинди. Маҳкум 5,2 миллиард леядан ортиқ (тахминан 288 миллион доллар) қайтариши керак», дейилади унинг сайтида.

Шорнинг ўзи бу қарорни ноқонуний деб атади. «Бугунги қарор билан расмийлар мендан норозилик ҳаракати, жамоам ва мен фуқароларнинг муносиб ҳаёт кечириши учун курашаётганим учун қасос олмоқда. Бу қарор мени умуман безовта қилмайди, бу менга умуман муҳим эмас. Мен бўйсунмайман, бу қарор амалдаги режим ўзгарганидан кейин иккинчи куни бекор қилинади», — деди Шор ўзининг Telegram-каналида.

Шор Молдова банк тизимидан республикада «аср ўғрилиги» деб аталган 1 миллиард долларни олиб чиқиб кетиш билан боғлиқ можарода айбланувчилардан бири. У 2015 йилда авж олди, Кишинёвда норозиликларни келтириб чиқарди ва икки ҳукумат ҳамда АҚШ ва ЕИни қўллаб-қувватлаган европапараст партиялар ҳукмрон коалициясининг қулашига сабаб бўлди. Кишинёвда расмийлар норозилик намойишларини Россиянинг Молдова ҳукуматини ағдариб, унинг ўрнига россияпараст ҳукумат қуриш режасининг бир қисми деб атади.