Макроиқтисодий тадқиқотлар институти ва Бизнес олий мактаби тузилмалари тасдиқланди

Ҳукуматнинг “Ўзбекистон Вазирлар Маҳкамаси ҳузуридаги Макроиқтисодий ва ҳудудий тадқиқотлар институтини ҳамда Бизнес ва тадбиркорлик олий мактаби фаолиятини ташкил этиш чора-тадбирлари тўғрисида”ги қарори қабул қилинди.

Президентнинг “Иқтисодий ислоҳотларни амалга оширишда илмий ёндашувларни кенгайтириш ва бошқарув кадрларини тайёрлаш тизимини янада такомиллаштириш чора-тадбирлари тўғрисида”ги қарорига мувофиқ: Макроиқтисодий ва ҳудудий тадқиқотлар институтининг тузилмаси; Бизнес ва тадбиркорлик олий мактабининг тузилмаси тасдиқланди.

Макроиқтисодий ва ҳудудий тадқиқотлар институти Иқтисодиёт ва молия вазирлиги ҳузуридаги Прогнозлаштириш ва макроиқтисодий тадқиқотлар институтининг, Бизнес ва тадбиркорлик олий мактаби эса – Иқтисодиёт ва молия вазирлиги ҳузуридаги Бизнес ва тадбиркорлик олий мактабининг барча ҳуқуқ ва мажбуриятлари бўйича ҳуқуқий вориси ҳисобланади.

Макроиқтисодий ва ҳудудий тадқиқотлар институтига давлат дастурларини ишлаб чиқиш ва амалга оширишда таклиф ва тавсиялар тайёрлаш, шунингдек бандликни таъминлаш ва аҳоли даромадларини ошириш юзасидан муаммоларни ўрганиш ва амалий таклифлар тайёрлаш, халқаро рейтинг ва индексларда мамлакат мавқейини ошириш бўйича тавсиялар тайёрлаш ва бошқа вазифалар юклатилди.

Бизнес ва тадбиркорлик олий мактабининг фаолияти “Бизнесни бошқариш” (MBA) мутахассислиги бўйича магистрлар тайёрлаш, вазирлик ва идоралар, маҳаллий ҳокимият вакилларининг малакасини ошириш ва қайта тайёрлашга қаратилган.