Днипрода янги қазилган қабрлар, Донецк областида ўлжа қилинган техникалар. Уруш суратлари

Украинадаги урушнинг 423-куни ўтди. Асосий маълумотлар:

• Белгородда 20 апрел куни Россия ҳарбий самолётидан снаряд тушиб кетган жойда авиабомба топилди. Оператив хизматлар 17 та кўп квартирали уй аҳолисини эвакуация қилди ва ер остидаги снарядни олиб чиқди. Уни кейин полигонда портлатишган.
• Володимир Зеленский Россияни «юксалтирадиган, абадийлаштирадиган, тарғиб қиладиган ёки символлаштирадиган» географик объектларга ном беришни тақиқловчи қонунни имзолади. Шунингдек, Зеленский Россия билан алоқадор бўлган 40 нафар жисмоний ва 300 дан ортиқ юридик шахсларга санкция қўллаган.
• Россия Москвада ишлаётган тахминан 90 нафар немис дипломатларидан 34 нафарини чиқариб юборди. Россия ТИВ бу қадамни Германиядан россиялик дипломатлар «ёппасига чиқариб юборилгани»га жавоб бўлганини маълум қилди.
• Евгений Пригожин Путиннинг матбуот котиби Дмитрий Песков ундан ўз ўғлини «Вагнер»га қабул қилишни сўрагани — ва у ҳозирда «оддий артиллериячи сифатида ишлаётгани»ни айтди.
• Албания бу ёзда РФ фуқаролари учун визасиз режим қўлламайди, аввалги йилларда шундай режим амал қилганди.

Бахмут узра тутун. Украина қўшини шаҳар мудофаасини давом эттирмоқда

Шаҳар учун жанг тўққизинчи ойдирки давом этмоқда. Бу ерда Украина томони ҳозирча инқирозли ҳолатни ортда қолдира олмади: Украина ҚК шаҳарнинг фақат ғарбий кварталларини назорат қилмоқда, бу ҳудуддаги гарнизон ҳам қуршовга тушиш хавфи остида.

21 апрел куни «Вагнер» ХҲК раҳбари Евгений Пригожин шаҳар тўлиқ қуршовга тушгани ҳақида гап йўқлиги ва унинг учун «оғир жанглар» давом этаётганини маълум қилди. Аввалроқ Пригожин шаҳарнинг 80 фоиз ҳудуди Россия бўлинмалари томонидан назорат қилинаётганини айтганди. Украина мудофаа вазири Анна Маляр эса Россия армияси ҳужумларни давом эттираётгани, «айрим участкаларда илгарилаётгани», аммо вазият «назорат остида қолаётгани»ни айтган.

Часив Ярдаги ҳаёт 

Изюмдаги вайронгарчиликлар 

Украина премьер-лигасида бир дақиқа сукут 

Днипрода олдиндан қазиб тайёрлаб қўйилган ўнлаб қабрлар

Россиянинг Украинага кенг кўламли босқинининг дастлабки уч ойида Днипро шаҳридаги ҳарбий қабристонга 293 киши дафн этилган — бу ҳақда 2022 йил июнида The Washington Post газетаси ёзганди. Ҳарбий капеллан Дмитро Поворотнийга кўра, ҳарбий ҳаракатларнинг олдинги саккиз йилида қабристонда 175 та қабр пайдо бўлганди. 2023 йил 21 апрелида олинган суратда ўнлаб янги қабрларни кўриш мумкин — улар олдиндан қазиб тайёрлаб қўйилган.

2023 йил апрелида Украина ҳукумати Киевда 50 минг қабр учун мўлжалланган ҳарбий қабристон, турли диний маросим бинолари ва музейни ўз ичига оладиган ёдгорлик мажмуасини ташкил этиш режаси ҳақида эълон қилганди. Олий рада 2022 йил май ойидаёқ махсус ажратилган ер участкасида шундай мажмуа қуриш тўғрисидаги қонунни қабул қилганди.

Донецк областида таъмирланаётган ҳарбий техникалар

Oryx’нинг OSINT-лойиҳаси маълумотларига кўра, кенг кўламли уруш бошланганидан буён Украина қуролли кучлари аввал Россия қуролли кучларига тегишли бўлган камида 544 та танк ва 265 та зирҳли транспортёрни қўлга киритган. Украинларнинг 2022 йил кузидаги юришидан кейин The Wall Street Journal нашри Россия Украинада қолдирган оғир қуроллар сони ғарбнинг исталган мамлакати Киевга етказиб берганидан кўпроқ экани ҳақида ёзганди.

Oryx таҳлилчиси Якуб Яновскийнинг қайд этишича, ўлжа қилиб олинган қуролларнинг фақат бир қисми ишлатишга яроқли — уларнинг аксар қисми таъмирлашни талаб этади. Украина ҚК 80-алоҳида десант-штурм бригадаси устахонасида механиклар ўлжа қилиб олинган техникаларни ҳам, Украинанинг шикастланган техникаларини ҳам таъмирлаш билан шуғулланмоқда. Бу техникалар тузатилиб, яна фронтга, Украина байроғи остида жанг қилиш учун юборилади.