Россияда кремлпараст ёзувчи Захар Прилепин автомобили портлаши оқибатида жароҳат олди

Нижний Новгород яқинидаги Пионерское қишлоғи ёнида кремлпараст ёзувчи Захар Прилепиннинг Audi Q7 автомобили портлаб кетди, деб хабар бермоқда 6 май, шанба куни Telegram’даги бир қанча рус тилидаги каналлар, жумладан, «112» ва Mash. Портлаш натижасида Прилепин яраланди, унинг ҳайдовчиси ҳалок бўлди, деб хабар қилди РИА «Новости».

Айни пайтда ёзувчининг матбуот хизмати у билан «ҳаммаси жойида»лигини айтди. «Нима содир бўлганлиги ҳозирча аниқланмаган. Захар Прилепин яхши», - дея Прилепин матбуот котибининг сўзларидан иқтибос келтирган ТАСС ахборот агентлиги. «Нижний Новгородда ёзувчи Захар Прилепиннинг машинаси портлатилган. У омон қолган, аммо яраланган, ҳуши жойида», - дея фавқулодда хизматлардаги суҳбатдошидан иқтибос келтирган агентлик. Дастлабки маълумотларга кўра, автомобиль тагига портловчи мослама ўрнатилган.

Аввалроқ «ВЧК-ОГПУ» Telegram-канали ёзувчи жиддий жароҳат олгани ҳақида хабар берган эди.

РБК газетаси манбасига кўра, Прилепин Донбассга ташрифидан сўнг Москвага қайтаётган бўлган. У чегара ҳудудидаги назорат-ўтказиш пунктини кесиб ўтган. Йўлда Прилепин Нижний Новгород вилоятида овқатланиш учун тўхтаб ўтган. Нашрнинг таъкидлашича, у машинага қайтиб келганидан кейин портлаш содир бўлган. 

Маълум қилинишича, Нижний Новгородда Захар Прилепин машинаси портлагандан сўнг, ҳозирда назорат-ўтказиш пунктлари ўрнатилмоқда. 

Baza Telegram-канали хабарига кўра, Прилепиннинг қизи портлашдан бир неча дақиқа олдин машинадан тушган. Портлаш вақтида у машинадан юз метр нарида бўлган.