Тадбиркорнинг савдо дўконини суд қарорисиз бузиб ташлаш ҳақида Қарши шаҳар прокурори Алишер Мирзаевдан топшириқ олган 4-сонли ИИБ бошлиғи Асрор Жўраев вазиятдан тўла хабардор бўлгач, уни бажаришни рад этади. Kun.uz қонунларни ҳимоя қилиши керак бўлган икки амалдорнинг тортишувига сабаб бўлган ҳодисани ўрганди.
Қарши шаҳар прокуратураси объектни бузиб олиш учун куч ташлаган пайтда, дўкондорнинг рафиқаси ўзини ёқиб юбормоқчи бўлган. Дўкондор Бобур Ходиевга кўра, турмуш ўртоғининг айни пайтда кўриш қобилияти заифлашган ва у шифохонада даволанмоқда.
Ходиевнинг қўлида Қарши шаҳар ҳокимининг 2008 йил 11 августдаги қарори бўлиб, у шу ҳужжат асосида фаолият кўрсатиб келган. Бироқ Кадастр агентлиги Қарши шаҳар бўлимининг қарори билан Ходиевга маъмурий жарима қўлланилган. Дўкон ўзбошимчалик билан қурилгани айтилган. Шундан сўнг иш суд тартибида кўрилган ва 2022 йил 30 ноябр куни Жиноят ишлари бўйича Қарши шаҳар судида Кадастр агентлиги Қарши шаҳар бўлимининг қарори бекор қилинган.
Тадбиркор 2023 йил 13 апрел куни шаҳар прокурори Алишер Мирзаевнинг топшириғи билан ҳудудга етиб келган ички ишлар ходимларига ушбу ҳужжатларни кўрсатади. Шундан сўнг ички ишлар идоралари вакиллари прокурорнинг ноқонуний талабини бажаришдан бош тортади. Бу орада Қарши шаҳрида 4-сонли ИИБ бошлиғи Асрор Жўраев ва прокурор Мирзаев ўртасида телефон орқали зиддият юзага келади.
“Сиз прокурорсиз, мен ҳам фуқаролар хавфсизлигини таъминлайдиган одамман. Сиз ҳампрезидентнинг одами, мен ҳам президентнинг одами. Тушундингизми, Алишержон? Менга сиз ўдағайламанг. Ўдағайласангиз, шахсий адоват қилсангиз, ана ундан кейин Чингачкукдек, очиқчасига, биттама-битта гаплашамиз”, – дейди Асрор Жўраев.
Эътиборни тортадиган яна бир ҳолат бор. 13 апрел куни дўконни бузишга уринилганда, Ходиевнинг турмуш ўртоғи ўзини ёқиб юбормоқчи бўлгани ҳақида айтдик. Ушбу ҳолат бўйича прокуратура вакили шаҳар прокурори Мирзаевга телефон орқали қисқача ҳисобот берган. Ўша суҳбат асносида прокурор Мирзаев суд қачон бўлишини сўрайди. Ходим эса 18 апрел куни суд бўлишини айтади. Демак, прокурор негадир суд қарорисиз тадбиркор мулкини бузишга жаҳд қилмоқда. Ёки у суд натижаларини олдиндан билганмиди?
Прокурор Мирзаев ва ички ишлар ходими Жўраев ўртасидаги тортишув ижтимоий тармоқларда тарқалгач, Бош прокуратура муносабат билдирди. Унга кўра, дўкон Қашқадарё вилояти кўп тармоқли тиббиёт марказига кириш дарвозаси ёнида бўлиб, тез тиббий ёрдам машиналарининг шифохона ҳудудига кириб-чиқишига тўсқинлик қилган ва фуқароларнинг эътирозларига сабаб бўлган. Бироқ биз қарийб икки соат давомида ушбу ҳудудда бўлиб, прокуратура келтирган важга гувоҳ бўлмадик.
Ходиев шу вақтгача Қарши шаҳар ободонлаштириш бошқармаси билан қилинган ижара шартномага асосан фаолият кўрсатиб келган. Тадбиркорнинг айтишича, прокурор Мирзаев ғазабидан қўрқиб, ободонлаштириш бошқармаси шартнома беришни тўхтатиб қўйган.
Қарши шаҳар ободонлаштириш бошқармаси бошлиғи Тоҳир Султоновдан вазиятга изоҳ олдик. У бизга Ходиев билан ҳеч қандай шартнома қилинмаганини айтди.
Бироқ Султонов бизга ёлғон маълумот берди. Ваҳоланки, тадбиркор шу вақтгача шартнома қилиб келингани ва мунтазам солиқ тўланганини тасдиқловчи ҳужжатлар, квитанцияларни тақдим этди.
Қашқадарё вилояти прокуратураси матбуот котиби Соҳибжон Ғайбуллаев бош прокуратуранинг расмий муносабатидан ортиқ маълумот тақдим қила олмаслигини айтди.
Қашқадарё вилояти Ички ишлар бошқармаси ахборот хизмати раҳбари Жавлон Бахтиев ҳам ҳолатни прокуратура ўрганаётгани, Бош прокуратура берган расмий маълумот билан чекланишини билдирди.
Айтиш мумкинки, мамлакатимизда прокурор ва ички ишлар тизими мансабдорларининг бир мавзу юзасидан жиддий зиддиятга бориши, у мавзу ортида тадбиркор тақдири, қонун ва қонундан ташқаридаги ҳолат туриши доим ҳам кузатилавермайди. Ички ишлар мансабдори Жўраев ўз профессионал вазифасини тўғри англаб, прокурорга эътироз қилган бўлса, ҳарқалай бу ҳолат бўйича Ички ишлар вазирлигининг ҳам муносабати бўлиши лозим эди.
Қашқадарёдаги ҳолат бўйича ўнлаб очиқ саволлар қолмоқда. Мавзу юзасидан юқори турувчи идоралардан асосли ва барча факт-далилларни ўрганган ҳолда холис муносабат кутиб қоламиз.
Kun.uz мавзуни кузатишда давом этади.
Исомиддин Пўлатов,
Kun.uz мухбири
Тасвирчи ва монтаж устаси: Фахриддин Ҳотамов.
