Одесса ўққа тутилди, Херсон ва Миколайив областларида эвакуация давом этмоқда. Уруш суратлари

Украинада урушнинг 472-куни ўтди. Асосий маълумотлар:

BBC рус хизмати ва «Медиазона» журналистлари кўнгиллилар ёрдамида Украинада ҳалок бўлган 25 мингдан ошиқ россиялик ҳарбий хизматчиларни номма-ном аниқлади.
Украина қўшини камида тўрт участкада қарши ҳужум ҳаракатларини бошлади, бу ҳақда Американинг Урушларни ўрганиш институти (ISW) ҳисоботида қайд этилган. The New York Times маълумотига кўра, ғарбдаги мулозимлар Украина қуролли кучлари қарши ҳужум давомида оккупация остидаги барча ҳудудларни озод этишини кутишмаяпти.
Канада бош вазири Жастин Трюдо Киевга келди. У Украина учун 500 миллион канада доллари қийматидаги янги ҳарбий ёрдам пакети ажратилишини анонс қилди. Трюдо шунингдек, Канада қирувчи самолётлар учун украин учувчиларини тайёрлаш билан шуғулланишига ваъда берди.
Дастлабки ҳисоб-китобларга кўра, Каховка ГЭС тўғони бузилиши оқибатида етказилган зарар миқдори 11,5 миллиард рублни ташкил этади, бу ҳақда Херсон областининг аннексия қилинган қисмига Россия томонидан тайинланган «ҳукумат» раиси Андрей Алексеенко маълум қилди.

Одессанинг ўққа тутилиши

10 июнга ўтар кечаси Россия қўшини ракета ва дронлар билан Одесса областини ўққа тутди. Украин расмийларига кўра, ҳужум оқибатида уч киши ҳалок бўлиб, камида 25 киши яраланган. «Жануб» оператив қўмондонлиги матбуот хизмати раҳбари Наталя Гуменюкка кўра, россияликларнинг барча дрон ва ракеталари уриб туширилган, аммо аппаратлардан бирининг парчалари кўп қаватли уй квартирасига келиб тушган — портлаш тўлқини яна бир неча турар жой биноларига шикаст етказган.
Serhii Smolientsev / Reuters / Scanpix / LETA

Одесса россияликларнинг дронлари билан ўққа тутилиши оқибатида вайронага айланган квартира
Serhii Smolientsev / Reuters / Scanpix / LETA

Россияликлар ҳужуми вақтида шикастланган кўп қаватли уй квартираларидан биридан ҳовлига тушиб кетган хонаки ўсимлик
Nina Liashonok / Укринформ / ZUMA Press Wire / Scanpix / LETA

Serhii Smolientsev / Reuters / Scanpix / LETA

Сув босган Херсон ўққа тутилиши

Каховка ГЭС тўғонидаги фалокат туфайли Херсон шаҳрининг ҳам бир қисмини сув босган. Энг жиддий жабрланган Корабел ва Днипропетровск районларининг айрим жойларида сув сатҳи учинчи қаватгача етган. 8 июн куни Херсонга Володимир Зеленский ташриф буюрганди, ўша куни шаҳар маркази РФ қўшинлари томонидан ўққа тутилди — бу вақтда Херсонда сув босган уйлардан аҳолини эвакуация қилиш ишлари олиб борилаётганди. Шаҳар расмийларига кўра, отишма оқибатида тўққиз киши жароҳатланган, улар орасида қутқарувчилар ҳам бор.

Херсоннинг сув босган ҳудудида итни қутқарган қутқарувчилар
Vasilisa Stepanenko / AP / Scanpix / LETA

Қутқарувчилар, ҳарбийлар ва кўнгиллилар шаҳар аҳолисини сув босган ҳудуддан эвакуация қилмоқда
Vladyslav Musiienko / Reuters / Scanpix / LETA

Херсоннинг сув босган ҳудудидан кекса ёшли аёлни олиб чиқаётган кўнгиллилар
Evgeniy Maloletka / AP / Scanpix / LETA

Херсон аҳолиси вакиллари ўт ўчирувчиларга россияликлар зарбаси оқибатида ёнғин чиққан уйдаги оловни ўчиришда ёрдам бермоқда
Evgeniy Maloletka / AP / Scanpix / LETA

Россияликларнинг шаҳарга ҳужумидан кейин ёниб кетган уйидан чиқаётган аёл
Felipe Dana / AP / Scanpix / LETA

Херсоннинг сувга ғарқ бўлган ҳудуди
Yan Dobronosov / Global Images Ukraine / Getty Images

Херсон областининг Каховка ГЭС тўғони бузилиши туфайли сув остида қолган ҳудуди. Украина президенти Володимир Зеленский халқаро ташкилотлар экологик фалокатга «шармандаларча бефарқлик» кўрсатаётганини айтди. БМТ маълумотига кўра, Украина ҳудудида 700 мингга яқин киши сув манбасидан узилган.
Roman Pilipey / Getty Images

Херсон области аҳолиси ичимлик сувини ғамламоқда
Roman Pilipey / Getty Images

Херсондаги черковда сув тошқини вақтида бошпанасидан айрилганлар дори-дармон ва озиқ-овқат олиши мумкин
Seth Herald / Anadolu Agency / ABACAPRESS / ddp images / Vida Press

Херсоннинг сувга ғарқ бўлган қисмида қутқарув амалиётлари ўтказишда фойдаланилаётган қайиқлар
Genya Savilov / AFP / Scanpix / LETA

Херсон областининг Россия назоратидаги ҳудудларидаги вазият

Каховка ГЭС тўғони бузилишидан уч кун ўтганидан кейин ҳам, 8 июн куни ҳолатига Днипро дарёсининг РФ кучлари назорат қилаётган сўл соҳилида олти минг киши эвакуация қилинишини кутаётганди — бу ҳақда «Верстка» эвакуация бўйича мурожаатларни қабул қилаётган кўнгиллиларга таяниб хабар берган. Энг кўп мурожаатлар Олешки шаҳридан бўлган.

Херсон областининг аннексия қилинган қисми «ҳукумати» маълумотига кўра, 9 июн кунига келиб сув босган ҳудудлардан 5,8 мингдан ортиқ киши олиб чиқилган, шундан 243 нафари болалар. Украина томони хабарига кўра, Днипронинг ўнг соҳилида сув босган ҳудудлардан 2412 киши эвакуация қилинган.