Францияда 6 кечалик тартибсизликлардан сўнг вазият юмшаяпти

Франция расмийларига кўра, 3 июлга ўтар кечаси мамлакатда 157 киши қўлга олинган. Сўнгги кунлардаги тартибсизликларга ўсмирнинг полициячи томонидан ўлдирилгани сабаб бўлган.

Нантерда 17 ёшли ўсмирнинг полициячи томонидан ўлдирилгани туфайли 27 июндан буён ҳар тунда тартибсизликлар кузатилаётган Францияда вазият нормаллашиши кутилмоқда. 3 июл, душанбага ўтар кечаси мамлакатда тартибни бузганлик учун бор-йўғи 157 киши, жумладан, Парижда 20 киши қўлга олинди, деб хабар бермоқда BFM TV.

Бу аввалги кечаларга қараганда анча кам. Шу тариқа, 1 июлдан 2 июлга ўтар кечаси, Франция Ички ишлар вазирлиги маълумотларига кўра, мамлакатда 719 нафар киши қўлга олинган, улардан 194 нафари - Парижда.

BFM TV телеканали мухбирларининг кузатувларига кўра, 3 июлга ўтар кечаси пойтахтнинг марказий кўчасида кескин вазият қайд этилмаган, у ерда 27 июндан бери полиция кучайтирилган таркибда тартиб-интизомга риоя этилиши устидан назорат олиб бормоқда.

Айни пайтда, Франциянинг Rfi медиа компанияси ҳукумат доираларининг исми ошкор этилмаган суҳбатдоши фикрини келтирди. Унга кўра, Франция "бу вазият билан ҳали тўлиқ шуғулланмаган ва биз (Франция расмийлари) кейинги бир неча соатдаги воқеаларга эътибор қаратишимиз керак".

2 июл куни кечқурун Елисей саройи матбуот хизмати Франция президенти Эммануэл Макрон 3 июл куни Миллий ассамблея президенти Яэл Брон-Пиве ва Сенат раиси Жерар Ларше билан юз берган тартибсизликлар атрофидаги вазиятни муҳокама қилиши, 4 июл куни эса у мамлакатнинг 220 дан ортиқ шаҳар ва коммуналлари ҳокимлари билан шу мавзуда учрашув ўтказиши ҳақида хабар берди. Бундан ташқари, Макрон Франция бош вазири Элизабет Борнга 3 июл куни парламент фракциялари раҳбарлари билан учрашув ўтказишни топширди.

Франция давлати раҳбари “ушбу воқеаларга сабаб бўлган сабабларни тушуниш бўйича пухта ва узоқ муддатли ишни бошлаш ниятида”, дейилади хабарда.