Ҳашарда битаётган мактаб: Боғдоддаги таълим даргоҳи бу йил ишга тушадими?

Фарғона вилояти Боғдод туманидаги Болғоли қишлоғида мактаб йўқ, 350 нафар ўқувчи олисдаги таълим муассасасига қатнаб ўқийди. Ечим сифатида 2021 йилда қишлоқдаги ҳар бир хонадондан 500 минг сўмдан пул йиғилиб, ҳашар йўли билан мактаб қурилиши бошланган. Аммо бинонинг асосий қисми қуриб битказилган бир вазиятда маблағ йўқлиги сабаб иш тўхтаб қолган. Қишлоқ аҳли мутасаддилардан таълим даргоҳини янги ўқув йилигача битказиб беришни сўрамоқда.

Таҳририятимизга келган мурожаатга кўра, Боғдод тумани “Қўғоли” МФЙ Болғоли қишлоғи болалари олисда жойлашган 23- ва 30-мактабларга қатнаб ўқишади.

Маълум бўлишича, мактаб қурилиши учун йиғилган пулдан ташқари қишлоқ аҳли “Ташаббусли бюджет”да ғолиб бўлган: 960 млн сўм маблағ эвазига таълим даргоҳининг томи ёпилиб, пол қисми битказилган, эшик-деразалар сотиб олинган. Бундан ташқари, қурилиш ишлари билан танишган вилоят ҳокими Хайрулло Бозоров мактаб учун спорт зали ва сув иншооти қуриб берган.

Болғоли қишлоғида 450 дан ортиқ хўжалик бор. Ҳар бир оиладан камида 2 ўқувчи 3 км йўл юриб мактабга қатнаб ўқишади. Ҳашар йўли билан бунёд этилаётган мактабнинг деярли 90 фоиз қисми битган.

Энг асосий масала иситиш тизими, ташқи фасад қисми ва ободонлаштириш ишларини якунига етказиб, мактабни янги ўқув йилига фойдаланишга топшириш кечикяпти. Бу борада ота-оналарнинг ёрдам сўраб бормаган идораю ташкилоти қолмаган.

Маҳалла фаоли Убайдулло Имомалиев болғолиликлар мактабнинг ишга тушишини интиқ кутаётганини таъкидлади.

“Болғоли қишлоғидаги янги мактабни қуриш учун ҳар бир хўжаликдан 500 минг сўмдан пул йиғдик. Астойдил ҳаракат қилиб опен бюджет лойиҳасида ғолиб бўлиб томини ёпиб, сувоғигача қилиб қўйдик. Фарзанд, невараларимиз Катта Фарғона канали кўпригидан ўтиб 30- ва 23-мактабларда икки сменада ўқиб келишади. Қиш кунлари айниқса мактабга қатнаш анча мушкул. Таълим даргоҳининг 90 фоиз қисми битди ҳисоб, қолганига қишлоқ аҳлининг қурби етмай қолган. Сентябр ойига битказиб ўқувчиларни янги мактабга жалб қилсак ўқувчилар хурсанд бўлар эди. Мактаб ҳашар йўли билан битган. 350ўринга мўлжалланган мактаб битиб қолса ёшларимизнинг оғири енгил бўлар эди”, дейди Убайдулло Имомалиев.

Муроджон Зиёвутдинов маблағ етишмаслигидан мактаб қурилиши тўхтаб қолгани ҳақида гапириб берди.

“Мактабимиз шу ҳолатга келгунича анча тер тўкдик. 2021 йилда собиқ ҳоким Восилжон Назаровни олиб келиб ерга қозиқни қоқиб ишни бошлаганмиз. Пул йиғиб, ҳомийлар топиб 2 йил давомида мактабнинг асосини битириб олдик. Ҳозирги кунда бинонинг ташқи фасади, иситиш тизими ва майдонларни ободонлаштириш ишлари қолган. Ўтган йили битиши керак бўлган мактаб маблағ етишмаслигидан боши берк кўчага кириб қолган.

Президентимиз 2023 йил сентябргача бир сменада бўлиши лозимлигини айтган. Қишлоғимизда икки қўшимча филиал бўлиб туриб ўқувчилар икки сменада ўқишяпти. Болалар уйга кеч соат 20:00-21:00ларда кириб келяпти. Қишлоқда 350 нафар ўқувчилар бошқа ҳудудга бориб ўқиб келишяпти. Барча мактаб сентябр ойига очилишини кутяпти. Мактаб учун парта, стол-стулларгача келган. Мактаб ҳовлисини асфальтлаш, стадион қуриш, фасад қисмини ва иссиқлик таъминотини бажарсак мактабимиз ишга тушади. Лекин маблағ етишмаслиги бизни қийнаяпти”, дейди Муроджон Зиёвутдинов.

“Мактабни шу даражага олиб келгунча аҳоли анча маблағ сарфлади. Мутасаддилардан 2023 йил сентябр ойига мактабимизни битириб беришларини илтимос қиламиз. Ёрдам сўраб бормаган жойимиз қолмади. Қишлоқ болалари Фарғона канали ва поезд йўлидан ўтиб олисдаги мактабларда ўқиб келишади. Қиш фаслида туман ва ёғингарчиликда айниқса фарзандларимиз қийналишяпти. Ҳашар йўли билан битай деб қолган мактаб очилиши негадир кечикяпти. Восилжон Назаров ҳокимлик қилган пайтда 30 тонна цемент, 30 миллион сўмлик арматура, 100 мингта ғишт олиб берилган эди. Ҳар бир оила 500 минг сўмдан пул йиғиб мактаб қурилишини бошлаган эдик. Опен бюджетда ютган пулимизга шифер, эшик-деразаларини олиб келиб ўрнаштирдик. Қўшимча қурилиш ишларига маблағимиз ҳам кучимиз ҳам қолмади”, дейди маҳалла фаолларидан яна бири Солижон Турсунов.

Боғдод тумани Мактабгача ва мактаб таълими бўлими раҳбари Шарифжон Ураимовдан ҳолат бўйича изоҳ олдик. У мактаб янги ўқув йилигача тўлиқ фойдаланишга топширилишига ваъда берди.

“330ўринга мўлжалланган 30-мактаб филиалининг 95 фоизи битган. 200 миллион сўм маҳаллий бюджетдан маблағ ажратилган. Июл ойи охири август ойидан мактабнинг фасад қисмини пардозлаш ишлари бошланади. Мактаб сентябр ойида тўлиқ ишга тушади. Бу бўйича ҳеч қандай муаммо йўқ. Сабаби ажратилган пул аниқ, манбаси бор. Фақат пул ажратилиб ишчи кучини ташласак мактаб тўлиқ битади. 2023 йил сентябрдан ўқувчилар шу мактабда таҳсил олади”, дейди Шарифжон Ураимов.

Боғдод тумани ҳокими ўринбосари Қаҳрамон Миртазоқулов Болғоли қишлоғи аҳолиси томонидан ҳашар йўли билан битказилаётган мактаб ҳақида маълумотга эга экани, таълим даргоҳини сентябр ойига фойдаланишга топширишга ҳокимлик томонидан ҳаракат бўлаётганини таъкидлади.

Kun.uz мухбирига мутасаддилар таълим даргоҳи сентябр ойида ишга тушишига ваъда беришди. Kun.uz мактаб билан боғлиқ ҳолатни кузатишда давом этади.

Сарвар Зиёев, Kun.uz
Монтаж устаси: Боймирза Халилов