Туркиядан Украинага қайтган «Азов» командирлари жанговар ҳаракатларда иштирок этади

«Азов» командирлари учун жанговар ҳаракатларда қатнашиш тақиқланганми, деган саволга Пивненко бундай тақиқ йўқлигини айтди. Унинг сўзларига кўра, «Азов» командирлари «ҳамма каби топшириқларни бажаришга тайёрланмоқда ва уни бажаради». 

«Фронтда юзага келаётган вазиятга қараб бу ўзгариши мумкин. Балки бир ой ичида жўнаб кетишар. Кўрамиз, воқеалар ривожининг ўзи кўрсатади», - деди у.

Аввалроқ «Азовстал» мудофаасига раҳбарлик қилган беш командир бир неча ой давомида Туркияда кузатув остида турганидан сўнг Украинага қайтарилганди.

Ҳарбийларни ватанга Украина президенти Володимир Зеленскийнинг ўзи шахсан олиб қайтган, у 7 июл куни Туркияга учиб келган ва Истанбулда мамлакат президенти Ражаб Тоййиб Эрдўған билан учрашган. 8 июл куни кундузи Зеленскийнинг матбуот хизмати эълон қилган видеода Туркия томони унга беш нафар ҳарбийни топширгани, кейин улар биргаликда президентлик самолётига чиқиб, учиб кетганини кўриш мумкин.

Украина қуролли кучлари Мариуполдаги «Азовстал» металлургия заводини Россия қўшинларидан 2022 йилнинг мартидан май ойи ўрталарига қадар ҳимоя қилган, комбинат ҳудудида улар билан бирга тинч аҳоли вакиллари ҳам яширинганди. Май ойининг иккинчи ярмида Украина қуролли кучлари бош штаби командирларга «шахсий таркиб ҳаётини сақлаб қолиш» бўйича топшириқ беради, шундан кейин «Азовстал» мудофаачилари (жами 2,5 минг ҳарбий) таслим бўлади.