НАТО расмийси Украина ҳудудий ён бериши кераклиги ҳақидаги гапини хато деб атади

НАТО бош котиби штаби раҳбари Стиан Йенссен уруш тугаганидан кейин Украина ҳудудий ён бериши мумкинлиги ҳақидаги сўзлари хато эканини тан олди. «Менинг бу борадаги баёнотим Украина келажаги учун эҳтимолий сценарийлар ҳақидаги кенгроқ муҳокаманинг бир қисми эди ва мен бундай демаслигим керак эди. Бу хато бўлди», деди у чоршанба, 16 август куни Норвегиядаги Verdens Gang (VG) нашрига.

Украиналикларнинг ўзи Россия билан музокаралар олиб бориш учун қандай шартлар ва нима бўйича келишиб олишга тайёр бўлишини ҳал қилиши керак, дея таъкидлади Йенссен. Унинг сўзларига кўра, Россия ҳарбий ҳаракатларидан ўзини ҳимоя қилаётган Украинани қўллаб-қувватлаш ниҳоятда муҳим. Бундан ташқари, Киев келажакда хавфсизлик кафолатларини олиши керак, деди НАТО расмийси. 

Столтенберг идораси раҳбарининг можароли баёноти 

Бир кун аввал Стиан Йенссен Украина «ҳудудининг бир қисмини Россияга бериш эвазига» НАТОга аъзо бўлиши ва бу урушни тугатиш ечимининг бир қисмига айланиши мумкинлигини тан олганди. «Менимча, ечим Украина ҳудудидан воз кечиши ва бунинг эвазига НАТОга аъзо бўлишига алоқадордир», деди у Норвегиянинг Арендал шаҳрида бўлиб ўтган дебатлар чоғида. Шу билан бирга, у НАТО раҳбари Йенс Столтенбергнинг аввалроқ айтган сўзларини такрорлади: «Украина қачон ва қандай шароитда музокара олиб боришни ўзи ҳал қилиши керак». 

Нашр журналистининг: «НАТО Украина Россия билан тинчликка эришиш ва келажакда альянсга аъзо бўлиш учун ҳудудни бериши керак, деб ҳисоблайдими?» деган саволига Йенссен урушдан кейинги эҳтимолий мақом бўйича муҳокамалар давом этаётганини ва бошқа давлатлар ҳам ҳудудларни Россияга бериш ҳақидаги масалани кўтараётганини айтди. «Мен шундай бўлиши керак демаяпман. Лекин бу эҳтимолий ечим бўлиши мумкин», деб тушунтирди у. 

Украина президенти девони ва ТИВ буни танқид остига олди

НАТО расмийсининг сўзлари Киевда кескин танқид қилинди. «Дунё тартибини сақлаб қолиш ва «ёмон тинчлик» ўрнатишга уринишлар, тан олайлик, рақиб томон ғалабаси тинчлик келтирмайди, балки шармандалик ва уруш олиб келади. Бу янги «Европа бўлиниши»нинг ҳар қандай форматига, шу жумладан, НАТО бўйича ҳолатга ҳам тегишли», деб ёзди Подоляк 15 август, сешанба куни X микроблоглар сервисидаги (собиқ Twitter) саҳифасида.  

Ўз навбатида, Украина Ташқи ишлар вазирлиги вакили Олег Николенко Украина ҳудудларининг бир қисмидан воз кечиш эвазига НАТОга қўшилиш ҳақидаги мунозараларни «мутлақо қабул қилиб бўлмас ҳолат» деб атади. «Украина ҳудудларининг бир қисмидан воз кечиш эвазига НАТОга қўшилиш ҳақидаги гапларни мутлақо қабул қилиб бўлмайди. НАТО расмийларининг ҳудудлардан воз кечиш бўйича берган баёнотлари Россия фойдасига ўйнайди. Украинанинг ғалабасини тезлаштириш ва НАТОга тўлиқ аъзо бўлиш йўлларини муҳокама қилиш эса евроатлантика хавфсизлиги манфаатларига мос келади», - деб ёзган у Facebook’да.