АҚШ, Россия ва Украина иштирокидаги уч томонлама музокаралар ноябр ойида тикланиши мумкин. Кремлдагиларнинг тегишли баёноти ортидан Украина президенти Володимир Зеленский ҳам бундай музокараларга тайёрлигини маълум қилди.
«Биз Россия бизнинг иштирокимиздаги уч томонлама учрашувни қўллаб-қувватлаши тўғрисида фидбек олдик. Америка томони буни имкон қадар тезроқ амалга оширишни таклиф қилмоқда. Биз буни қўллаб-қувватлаймиз», – деди у 21 октябр куни кечқурунги баёнотида.
Зеленский эҳтимолий учрашув санасини айтмаган, аммо АҚШ музокараларни яқин вақтлар ичида ўтказиш учун «имкон доирасидаги барча ишни қилаётгани»ни таъкидлаган. «Ўйлайманки, ноябр ойи бошидан кечикмайди», – дея қўшимча қилган у.
Зеленский музокарачиларнинг асосий вазифаси, уруши якунланиши ва тинчлик бошланишини яқинлаштиришдан ташқари, етакчилар учрашувига тайёргарлик кўриш эканини қайд этган. Украина президенти Киев музокараларда ҳар қандай оташкесимни (тўлиқ ёки қисман ўт очишни тўхтатиш) қўллаб-қувватлашини айтди.
21 октябр куни кундузи, Петербургда АҚШ президенти махсус вакили Стив Уиткофф ва Владимир Путин ўртасида музокаралар бўлиб ўтганидан кейин, РФ президенти ёрдамчиси Юрий Ушаков ноябр ойида уч томонлама музокаралар бўлиб ўтишини анонс қилганди. У Россия «урушдан кейин Россия ва Украина учун хавафсизлик тизимини яратиш ҳақидаги асосий мавзу бўйича» музокараларни қайта бошлашга тайёрлигини таъкидлади. Президент ёрдамчиси музокаралар «ноябр ойининг ўнинчисида», яъни АҚШ Конгресси учун оралиқ сайловлар бўлиб ўтганидан кейин старт олишини айтганди.
Ушаков Уиткофф Путинга тақдим этган «янгиланган тинчлик режаси»да «Украина инқирозини ҳал қилиш нуқтайи назаридан фойдали нарсалар унчалик кўп эмаслиги»ни таъкидлади. Шу билан бирга, уруш қачон тугаши ҳақидаги саволга жавобан эса «иш шунга қараб кетаётгани»ни айтди.
РФ президенти матбуот котиби Дмитрий Песков бугун музокараларга Абу-Даби мезбонлик қилиши мумкинлигини маълум қилди. Песковдан Россия ушбу учрашувда имзолаш учун қандайдир ҳужжатларни тайёрлайдими, дея сўралган. У эса шундай жавоб берган: «Сиз анча олдинга ўтиб кетяпсиз. Бундай қилиш керак эмас».
Стивен Уиткоффнинг ўзи Санкт-Петербургдан Ослога учиб келди, бу ерда иттифоқчиларни Путин билан мулоқоти мазмунидан хабардор қилди. Шундан кейин ижтимоий тармоқдаги саҳифасида уч томонлама форматдаги ишлар «техник даражада давом эттирилиши» ҳақида ёзди.
Доналд Трамп Уиткоффнинг Осло ва Санкт-Петербургга сафари якунларини изоҳларкан, ҳозирда уруш тугаши «ҳар қачонгидан ҳам яқинроқ бўлиши мумкинлиги»ни айтди. У шу кунларда бу ҳақда Путин билан гаплашганини таъкидлаган.
