Ҳиндистон компанияси Наманганда соғломлаштириш маркази учун сармоя киритади

Чортоқ туманида санатория ва соғломлаштириш марказини ташкил этиш лойиҳасига 5 млн доллар ажратиш режалаштирилган.

Фото: Дунё АА

Ўзбекистоннинг Деҳлидаги элчихонаси кўмагида Наманган вилояти ҳокимининг ўринбосари Окибжон Иномов Ҳиндистоннинг EI Company компанияси раҳбари Митеш Верма билан учрашди.

Мулоқот чоғида Чортоқ туманида санатория ва соғломлаштириш марказини ташкил этиш лойиҳасини амалга ошириш истиқболлари муҳокама қилинган.

Томонлар янги қўшма соғломлаштириш масканини барпо этиш билан боғлиқ ташкилий масалаларга эътибор қаратиб, уни замонавий асбоб-ускуналар билан таъминлаш, энг сўнгги билим ва технологияларни жорий қилиш, мутахассислар малакасини тизимли тарзда ошириб бориш бўйича чоралар кўриш юзасидан ўзаро фикр алмашилгани айтилмоқда.

Ҳиндистон компанияси томонидан мазкур лойиҳани ҳаётга тадбиқ этиш доирасида 5 миллион АҚШ доллари миқдоридаги сармоя киритилиши режалаштирилмоқда.