Нотурар жойни расмийлаштиришдан аввал яшовчиларни рўйхатдан чиқариш талаб этилади

Вазирлар Маҳкамасининг «Фуқароларни рўйхатга қўйиш тартибини такомиллаштириш муносабати билан ҳукумат айрим қарорларига ўзгартириш ва қўшимчалар киритиш тўғрисида»ги қарори қабул қилинди.

Ҳужжат билан қуйидагиларга ўзгартиришлар киритилмоқда: 

Бино ва иншоотларнинг ихтисослашишини ўзгартириш, қайта қуриш, реконструкция қилиш ҳамда ўз ҳудудида қўшимча бино ва иншоотлар қуришни лойиҳалаштиришга рухсатнома бериш бўйича давлат хизматлари кўрсатишнинг маъмурий регламентига;
 
Кўчмас мулкка бўлган ҳуқуқларни давлат рўйхатидан ўтказиш бўйича давлат хизматлари кўрсатишнинг маъмурий регламентига.

Ўзгартиришларга мувофиқ:

турар жой нотурар жой тоифасига ўтказилаётганда у ерда вақтинчалик ёки доимий рўйхатдан ўтказилган барча шахслар мазкур жой кадастр органларида қайта расмийлаштирилгунига қадар рўйхатдан чиқарилиши лозим;

фуқаролар рўйхатдан чиқарилганликлари ҳақида маълумот «Рақамли ҳукумат» платформаси орқали текширилади;

объектнинг ихтисослашишини ўзгартириш бўйича рухсатномага ўзгартирилган объектга бириктирилган ер участкасининг чегара схемаси илова қилинади.