Жо Байден Марказий Осиё давлатларидан бирига келиши мумкин

АҚШ президенти Жо Байден С5+1 форматидаги биринчи Марказий Осиё – АҚШ раҳбарлари учрашуви сўнгида бу мулоқотни “тарихий” деб атади.

“Бунинг тарихий лаҳза деб ҳисоблайман. Бизнинг учрашувимиз пойдеворида Марказий Осиё ва Қўшма Штатлар ўртасидаги ўзаро суверенитет, мустақиллик, ҳудудий яхлитликка содиқлигимизга асосланган кўп йиллик яқин ҳамкорлигимиз турибди. Бу тамойиллар ҳозир ҳар қачонгидан ҳам кўпроқ аҳамиятга эга, деб ўйлайман. Бугун эса биз ҳамкорлигимизни янги даражага олиб чиқяпмиз”, – деди Байден.

АҚШ президенти унинг мамлакати Марказий Осиё билан терроризмга қарши курашиш, иқтисодий боғлиқликни кучайтиришга доир йўналишларда ҳамкорликни мустаҳкамлашга интилаётганини қайд этиб, минтақадаги ногиронлиги бўлган шахслар учун Америка томонидан янги ташаббус илгари сурилаётганини таъкидлади.

“Бугунги сермаҳсул суҳбатимиз учун барчангизга ташаккур айтмоқчиман. Келгусида янада кўпроқ биргаликда ишлашимизни сабрсизлик билан кутаман. Мен бу учрашувимизнинг давомини ҳам кўришни чин дилдан истайман, чунки ишончим комилки, биз – халқларимиз бирга бўларкан эканмиз, кучлироқ бўламиз, дунё ҳам хавфсизроқ бўлади”, – деди у.

Жо Байден марказий осиёлик ҳамкасбларига яна бир бор ташаккур билдирди ва баёнотини шундай якунлади:

“Сизлар билан тез орада, эҳтимол мамлакатларингиздан бирида учрашишга умид қилиб қоламан. Раҳмат”.

Маълумот учун, айни пайтга қадар АҚШ президентлари Марказий Осиёнинг ҳеч бир давлатига ташриф буюрмаган. Ҳозирча минтақага келган энг юқори лавозимли америкалик сиёсатчилар АҚШ давлат котиблари бўлган. 1992 йилдан кейинги даврда Давлат департаментини бошқарган 11 нафар дипломатдан 7 нафари Ўзбекистонга келган.