«С5+1» саммити раҳбарлари қўшма баёноти эълон қилинди 

19 сентябр куни БМТ Бош Ассамблеясининг 78-сессияси доирасида бўлиб ўтган «С5+1» (Марказий Осиё + АҚШ) саммити раҳбарларининг қўшма баёноти Оқ уй сайтида эълон қилинди. 

Томонлар савдо, энергетика, иқлим ва хавфсизлик каби мавзуларда ўзаро ҳамкорлик қилишга эътибор қаратдилар. 

Қўшма баёнотнинг мазмуни қуйидагича:

- давлатлар барча мамлакатларнинг мустақиллиги, суверенитети ва ҳудудий яхлитлигини ҳурмат қилади;

- С5+1 платформаси орқали ҳамкорликни мустаҳкамлаш, савдо, энергетика, иқлим ва хавфсизлик каби мавзуларда ўзаро ҳамкорлик қилиш ва «жамоавий ечим учун юқори даражадаги мулоқотни давом эттиришга интилиш» ниятида;

- «минтақадаги мураккаб муаммоларни ҳал қилиш ва юзага келаётган таҳдидларни бартараф этиш учун барқарор ҳамкорлик» қарашларига қўшилиш;

- глобал муаммоларга минтақавий ечим топиш бўйича С5+1 мақсадларига риоя қилиш;

- Марказий Осиёда хавфсизликни кучайтириш, иқтисодий барқарорликни ошириш, барқарор ривожланишни қўллаб-қувватлаш, иқлим ўзгаришига қарши курашиш ва тинчликни мустаҳкамлашга қаратилган фаолиятни қўллаб-қувватлаш;

- учрашув АҚШ ва Марказий Осиё давлатлари ўртасидаги ҳамкорликнинг навбатдаги боби бўлиб, С5+1 механизмининг муҳимлигини таъкидлайди;

- АҚШ ва Марказий Осиё давлатлари Афғонистондаги вазият шароитида хавфсизлик соҳасида ҳамкорликни кучайтириш ниятида;

- транспорт йўналишларини диверсификация қилиш учун Транскаспий савдо йўлини, энергия инфратузилмасини янада ривожлантириш ва Марказий Осиёни Жанубий Осиё билан боғловчи транспорт тармоқларини кенгайтириш. 

Эслатиб ўтамиз, Ўзбекистон президенти Шавкат Мирзиёев Нью-Йорк шаҳрига ташриф дастурига мувофиқ 19 сентябр куни Марказий Осиё мамлакатлари ва Америка Қўшма Штатлари етакчиларининг «C5+1» форматидаги биринчи саммитида иштирок этди. 

Тадбирда АҚШ президенти Жозеф Байден, Қозоғистон президенти Қосим-Жўмарт Тўқаев, Қирғизистон президенти Садир Жапаров, Тожикистон президенти Эмомали Раҳмон ва Туркманистон президенти Сердар Бердимуҳамедов қатнашди.