Финландия Хитой кемасини Balticconnector газ қувурига зарар етказганликда айблади

Финландия миллий тергов бюроси Balticconnector сувости газ қувурига етказилган зарарнинг техник сабабини аниқлади. Бош терговчи Ристо Лоҳи матбуот анжуманида берган маълумотга кўра, Ҳонконг байроғи остидаги Newnew Polar Bear кемаси қувурнинг шикастланишига сабаб бўлган.

Қайд қилинишича, денгиз тубида 1,5 метрдан 4 метргача кенгликдаги из топилган, у газ қувурининг шикастланиш жойига олиб борган. Ундан бир неча метр нарида кема лангари топилган.

«Бугун эрта тонгда лангар кўтарилди ва унинг газ қувурига тегиб кетганини кўрсатувчи излар борлиги аниқланди. Бундан ташқари, биз кеманинг олдинги иккала лангари жойида эканини визуал тарзда тасдиқлай олмадик, бу эса айнан шу кемадан шубҳаланишга асос бўлди», деди Лоҳи.

У Newnew Polar Bear кемаси билан бир неча бор боғланганини, бироқ улар ҳамкорлик қилишни истамаганини таъкидлади. Энди улар Хитой расмийлари билан боғланишга ҳаракат қилмоқда.

«Ҳодисалар кетма-кетлигида қасддан ёки эҳтиётсизлик борлигини аниқлашга алоҳида эътибор қаратилади», деб қўшимча қилди терговчи.

8 октябр куни Gasgrid Finland компанияси ва Эстониянинг Elering оператори Balticconnector газ қувуридаги босим пасайиб кетганини маълум қилди.

Финландия бош вазири Петтери Орпо ташқи таъсир оқибатида газ қувурига зарар етказилгани ҳақида баёнот берди.

НАТО агар қувурга қўпорувчилик мақсадида қасддан зарар етказилгани аниқланса, қатъий чора кўрилишини маълум қилди.

Латвия президенти Эдгар Ринкевич агар Россия бу операцияни амалга оширгани аниқланса, Болтиқ денгизидаги кемалар ҳаракати ёпилиши кераклигини айтган эди.