Францияда россиялик миллиардер санкцияларни бузгани учун қўлга олинди

Францияда россиялик миллиардер ва "Альфа-Групп" асосчиси Алексей Кузмичев пул ювиш, солиқ тўлашдан бўйин товлаш ва санкциялар режимини бузганликда гумонланиб қўлга олинди, деб ёзади Le Monde газетаси манбаларга таяниб. 

Мамлакат прокуратураси тинтувлар тадбиркорнинг Париждаги уйи, шунингдек, Сен-Тропедаги вилласида ўтказилганини тасдиқлади.

Кузмичев 2022 йилнинг март ойида Европа Иттифоқи санкциялари остида қолган. 

Брюсселда уни "Россиядаги энг нуфузли одамлардан бири" деб аташган, у "Путин билан бизнес алоқаларини сақлаб туриши" билдирилган. 

Санкциялар Европа Иттифоқи мамлакатларига киришни тақиқлайди, бироқ Le Monde манбасининг аниқлик киритишича, бизнесмен чекловларга дучор бўлган пайтда Францияда бўлган.