Ғазо секторидаги вазиятга бағишланган бир кунлик конференция иштирокчилари ёрдам етказилишига рухсат бериш учун кўпроқ чегара пунктларини очишга чақирди.
Ғазо секторидаги вазиятга бағишланган Париждаги гуманитар конференция иштирокчилари Ғазога юкларни етказиб бериш учун кўпроқ чегара ўтиш жойларини очиш ва гуманитар пауза қилишга чақирди. Франция президенти Эммануэл Макрон 9 ноябр, пайшанба куни: «Бизга имкон қадар тезроқ гуманитар пауза керак ва ўт очишни тўхтатишга ҳаракат қилишимиз керак. Ғазо секторидаги гуманитар ташкилотлар фаолияти учун зарур шарт-шароитларни яратишимиз керак», деди бир кунлик форумнинг очилишида.
Бирлашган Миллатлар Ташкилотининг Яқин Шарқдаги фаластинлик қочқинларга ёрдам кўрсатиш агентлиги раҳбари Филипп Лаззарини Ғазодаги фуқаролик инфратузилмаси, жумладан БМТнинг ички кўчирилганлар учун объектлари у ерга инсонпарварлик ёрдами етказилиши учун фаол ишлашда давом этиши кераклигини таъкидлади. Лаззаринининг сўзларига кўра, Миср ва Ғазо сектори ўртасидаги Рафаҳ чегара пунктининг ўзи ёрдам узлуксиз келишини таъминлаш учун етарли эмас.
Қизил Хоч гуманитар фалокат хавфи ҳақида огоҳлантирмоқда
Халқаро Қизил Хоч Қўмитаси (ХҚХҚ) президенти Миряна Сполярич-Эггер ҳам халқаро ҳамжамиятни Ғазо секторида гуманитар ёрдам кўрсатиш учун шарт-шароит яратишга чақириб, Ғазо секторида гуманитар фалокат юз бериш хавфи борлигини таъкидлади.
Конференцияда ГФР вакили бўлган Германия Ташқи ишлар вазирлиги давлат вазири Тобиас Линднер Париждаги саммитни «бу оғир пайтларда муҳим сигнал» деб атади. Линднер Ғазо халқига гуманитар ёрдам кўрсатишга чақирди. Бу кураш тинч аҳолига қарши эмас, балки ҲАМАС гуруҳига қарши олиб борилмоқда, деди Линднер.
Исроил вакиллари Париж конференциясида иштирок этмаяпти, бироқ Макрон Исроил бош вазири Бинямин Нетаняҳу билан алоқада эканини ва конференциядан кейин у билан гаплашишини айтди. Макрон ўз нутқи давомида Исроилни «қонунларни ҳурмат қилишга ва тинч аҳолини ҳимоя қилишга» чақирди. «Зўравонликка эркинлик бериш бизнинг қадриятларимиздан воз кечиш демакдир», - деди Макрон. У тинч аҳолининг азобланишида ҲАМАСни айблади.
Исроил-Фаластин можароси
7 октябр куни эрталаб ҲАМАСнинг ҳарбий қаноти - «Иззаддин ал-Қассам бригадалари» Исроилга қарши «Ал-Ақсо тўфони» операцияси бошланганини эълон қилди. Ғазо секторидан Исроил томон минглаб ракеталар отилди, қуролли гуруҳлар Исроил аҳоли пунктларига кирди.
ҲАМАСнинг билдиришича, операция босиб олинган Шарқий Қуддусдаги Ал-Ақсо масжидига бостириб кириш ва исроиллик муҳожирларнинг фаластинликларга нисбатан зўравонлиги кучайиб бораётганига жавобан амалга оширилган.
Бунга жавобан Исроил армияси Ғазо секторида ҲАМАСга қарши ўнлаб қирувчи самолётлардан фойдаланган ҳолда «Темир қиличлар» операцияси бошланганини эълон қилди.
Исроил-Фаластин можароси авж олгандан бери 10 мингдан ортиқ фаластинлик ҳалок бўлди. Исроилда қурбонлар сони 1400 дан ошади. Ғазонинг 2,3 миллион аҳолиси Исроилнинг ҳаводан оммавий бомбардимон қилиши ва эксклавнинг тўлиқ блокадаси туфайли озиқ-овқат, сув ва дори-дармонлар танқислигидан азият чекмоқда.
