АҚШ-Канада чегарасида автомобил портлаб кетди

Rainbow кўпригида автомобил портлаши оқибатида икки киши ҳалок бўлди, деб хабар бермоқда CNN ва Fox News. ФТБ тергов олиб бормоқда. Қўшма Штатлар ва Канада ўртасидаги тўртта чегара пункти вақтинча ёпилди.

Фото: Reuters

Ниагара шаршараси яқинида АҚШ ва Канада ўртасидаги Камалак кўпригида (Rainbow Bridge) автомобил портлаб кетди, деб хабар берди 22 ноябр, чоршанба куни Федерал тергов бюроси (ФТБ). Ҳодиса оқибатида машинада бўлган икки киши ҳалок бўлди, деб таъкидлади Американинг CNN ва Fox News телеканаллари полиция ходимларига таяниб. Бундан ташқари, Reuters агентлигининг хабар беришича, АҚШ чегара хизматининг бир ходими яраланган.

Ҳуқуқ-тартибот идоралари ҳодиса тафсилотларини маълум қилмаган. Ҳозирда тергов ҳаракатлари бошланган. ФТБ вазият «тез ривожланаётганини» билдирди.

Баъзи ОАВ хабарларига кўра, АҚШдан Канадага кетаётган автомобил қарама-қарши бўлакда катта тезликда чегара ўтиш жойига яқинлашган.

Ню-Йорк штати губернатори: теракт белгилари йўқ

Икки давлат ўртасидаги тўртта чегара ўтиш пункти вақтинча ёпилди. Буффало Ниагара халқаро аэропортида хавфсизлик чоралари кучайтирилди, дея маълум қилди Ню-Йорк штати губернатори Кэти Хокул. Унинг сўзларига кўра, теракт белгилари йўқ. Камалак кўприги ёпиқлигича қолмоқда, аммо қолган ўтиш жойлари бўйлаб ҳаракат тикланди, деди Хокул.

АҚШ президенти Жозеф Байден воқеа ҳақида хабардор қилинган, дея хабар берди Оқ уй. Канада бош вазири Жастин Трюдо вазиятни «жуда жиддий» деб атади.