Жиззах вилоятида юк машинаси темирйўл кўпригини шикастлади

17 ноябр куни Зомин тумани ва Жиззах шаҳри ўртасида Howo юк машинаси темирйўл кўприги остидан ўтаётганда унинг бир қисмини шикастлади. Таъмирлаш ишлари якунлангунича кўприк бир муддатга ёпилди.

Фото: Ўзбекистон темир йўллари

Жиззах вилоятида юк машинаси темирйўл кўпригини шикастлади. Бу ҳақда 23 ноябр куни «Ўзбекистон темирйўллари» АЖ хабар берди.

Қайд қилинишича, HOWO маркали юк машинаси «Жиззах–Сайхун» темирйўл участкасининг Зомин тумани ва Жиззах шаҳри ўртасида жойлашган темирйўл кўприги остидан ўтаётганида борти билан унинг бир қисмини шикастлаган.

Шундан сўнг, хавфсизлик ва тиклаш ишлари учун темирйўл кўприги «бир муддат ёпилган». Мутахассислар шикастланган кўприкни тиклаган.

Ҳозирги вақтда барча тиклаш ишлари якунланиб, поездлар ҳаракати тиклангани таъкидланмоқда.

Хабарда бу воқеа қачон рўй берганига аниқлик киритилмаган, аммо бу ҳолат тасвирлари камида бир ҳафта олдин тарқалганди.