Францияда иммиграция қонунига қарши намойишлар бўлиб ўтди

Минглаб одамлар иммиграция қонунига қарши мамлакат конституциявий кенгашининг бу борадаги қарори эълон қилиниши арафасида норозилик билдирди.

Фото: GUILLAUME BAPTISTE / AFP

Францияда ўн минглаб одамлар янги иммиграция қонунига қарши норозилик намойишига чиқди, деб хабар берди Le Monde 21 январ, якшанба куни. Ички ишлар вазирлиги намойишчилар сонини 75 минг киши деб ҳисоблаган, ташкилотчилар эса 150 минг нафар намойишчи борлигини айтган. Franceinfo телеканалига кўра, Париж, Лилл, Канн, Лион ва бошқа шаҳарларда турли акциялар бўлиб ўтган.

Франция пойтахтида Эйфел минораси яқинида 16 минг киши йиғилди, 2000 га яқин киши Лилл, Канн, Лион, Бордо ва Мецдаги митингларда қатнашди. Тулузадаги норозилик намойишларида уч мингдан тўрт минггача намойишчилар ҳисобга олинди.

Франция парламенти қонун лойиҳасини иккинчи уринишда маъқуллади

Франция миллий Ассамблеяси (парламентнинг қуйи палатаси) декабр ойида сенатдан кейин президент Эммануэл Макроннинг мунозарали иммиграция қонунини маъқуллаган эди. Қонун лойиҳаси, жумладан, ноқонуний мигрантларни депортация қилишни соддалаштириш ва миграция квоталарини жорий этишни назарда тутади. Баъзи ижтимоий нафақаларни олиш шартлари кучайтирилди - энди Европа Иттифоқидан ташқаридаги мамлакатлардан келган ишсиз муҳожирлар Францияда 5 йил бўлганидан кейин уни олиши мумкин бўлади.

Бундан ташқари, Франция ҳуқуқ-тартибот идоралари ходимларига қарши жиноят содир этган икки фуқаролиги бўлган шахслар француз паспортини йўқотиши мумкин. «Бугун қаттиқ чоралар кўриш керак», деди овоз бериш тугаганидан кейин ички ишлар вазири Жералд Дарманен. Қонун мухолифлари фикрича, у ўнг кайфиятнинг кучайишига, шунингдек, ирқий ва миллий асосда камситишлар кўпайишига олиб келади.

Бир неча кун олдин парламент ҳужжатни рад этди. Асл нусхада қонун лойиҳаси мигрантларнинг интеграциялашувига кўмаклашиш, шунингдек, Францияга ноқонуний йўллар билан келганларни депортация қилишни соддалаштиришга қаратилган эди. Бироқ, кейинчалик Макрон тарафдорлари кўпчиликка эга бўлмаган сенат ҳужжатнинг аксарият бандларини қатъийлаштирди. Франция конституциявий кенгаши қонуннинг конституцияга мувофиқлиги ҳақидаги қарорини 25 январ куни эълон қилиши кутилмоқда.