Ўзбекистонда яна 16 та туман ҳокимларининг лавозимига лойиқлиги кўриб чиқилади

Президент 2023 йилда 16 та туманда бирорта кўп қаватли уй-жой қурилмагани, ҳокимлар буни режа ҳам қилмаганини айтди. Бош вазирга мазкур туманлар ҳокимларининг лавозимига лойиқлигини кўриб чиқиш топширилди.

Шавкат Мирзиёев уй-жой, қурилиш, коммунал хўжалиги, транспорт ва экология соҳаларида амалга оширилган ишлар ва устувор вазифалар юзасидан йиғилишда 16 туман ҳокимларининг лавозимга лойиқлиги кўриб чиқишни топширди.

Мажлисда ўтган йили ҳудудларда 2 мингта кўп қаватли уй-жой қуриб, аҳолига топшириш бўйича олинган режа тўлиқ бажарилмай қолгани, яъни 124 та уй-жой қурилиши якунланмагани, қурилган уйлардан 450 таси ҳалигача фойдаланишга топширилмагани қайд этилди.

Бундан ташқари, уй-жойга талаб юқори бўлса-да, 2023 йилда 16 та туманда бирорта кўп қаватли уй-жой қурилмагани, туман ҳокимлари буни режа ҳам қилмагани танқид қилинди.

Шу сабабли бош вазир Абдулла Ариповга Нукус, Қоровулбозор, Навбаҳор, Косонсой, Нуробод, Олтинсой, Музработ, Қизириқ, Бандихон, Оқолтин, Сайхунобод, Мирзаобод, Ховос, Пискент, Қўштепа, Боғдод туманлари ҳокимларининг лавозимига лойиқлигини кўриб чиқиш топширилди.

Маълумот учун:

Қорақалпоғистоннинг Нукус туманига 2023 йил августидан буён Зияуатдин Зайтов;
Бухоро вилоятининг Қоровулбозор туманига 2018 йил мартидан буён Акмал Остонов;
Навоий вилоятининг Навбаҳор туманига 2022 йил майидан буён Азамат Ўроқов;
Наманган вилоятининг Косонсой туманига 2021 йил декабридан буён Дилмурод Қодиров;
Самарқанд вилоятининг Нуробод туманига 2022 йил октябридан буён Сирожиддин Бердиқулов;
Сурхондарё вилоятининг Олтинсой туманига 2023 йил январидан буён Баҳром Маҳматрайимов;
Сурхондарё вилоятининг Музработ туманига 2022 йил сентябридан буён Эркин Алимов;
Сурхондарё вилоятининг Қизириқ туманига 2023 йил январидан буён Шерзод Ражабов;
Сурхондарё вилоятининг Бандихон туманига 2023 йил январидан буён Абдумалик Алламурадов;
Сирдарё вилоятининг Оқолтин туманига 2023 йил июлидан буён Комилжон Эрназаров;
Сирдарё вилоятининг Сайхунобод туманига 2023 йил ноябридан буён Анвар Каримов;
Сирдарё вилоятининг Мирзаобод туманига 2023 йил октябридан буён Сарвар Султонов;
Сирдарё вилоятининг Ховос туманига 2023 йил августидан буён Улуғбек Йўлдошев;
Тошкент вилоятининг Пискент туманига 2023 йил январидан буён Нодирбек Ёқубов;
Фарғона вилоятининг Қўштепа туманига 2018 йил июнидан буён Илёсбек Валериевич Новиков;
Фарғона вилоятининг Боғдод туманига 2022 йил январидан буён Юсуфжон Ҳусайинов ишлаб келмоқда.

Бундан аввалроқ Шавкат Мирзиёев бош вазирга Нукус, Жиззах, Бекобод шаҳарлари, Шароф Рашидов, Деҳқонобод, Учқўрғон, Урганч туманларида саноат маҳсулотларини ишлаб чиқаришда ўсиш бўлмагани муносабати билан ушбу 7 та ҳудуд ҳокимларининг лавозимига лойиқлигини кўриб чиқишни топширганди.

Шунингдек, жойлардаги иқтисод бўйича ҳоким ўринбосарлари, вилоят ва туманлардаги иқтисодиёт бўлимлари раҳбарлари инфляцияни жиловлашни ўйламагани сабабли бош вазирга 9 та туман-шаҳардаги ҳоким ва сектор раҳбарларининг лавозимига лойиқлигини кўриб чиқиш топширилган.