Тошқин Оренбурггача етиб келган. Уралда сув сатҳи критик даражадан ошиб кетган ва кўтарилишда давом этмоқда

Шаҳар расмийларига кўра, 10 апрел куни Оренбург ҳудудида Уралдаги сув сатҳи минг сантиметрдан ошган. Ундан олдинги кунда бу ҳудудда сув сатҳи қарийб бир метрга кўтарилганди.

Гидрологлар яқин кунларда Оренбург ҳудудида Урал суви кунига 30-70 сантиметрдан ошишини прогноз қилмоқда.

Урал ирмоқларидан бири Сакмара дарёсида сув сатҳи 813 сантиметрга етган, 870 сантиметр хавфли нуқта ҳисобланади.

Ўтган кун давомида Оренбургда 300 дан ортиқ уй сув остида қолган, яна 200 тасини яқин вақтлар ичида сув босиши мумкин, деб хабар берган шаҳар раҳбарининг биринчи ўринбосари Алексей Кудинов. Оренбургда ва унинг атрофида жами 2,5 минг атрофида томорқа ва 2 минг атрофида уйларни сув босган.

Аввалроқ Оренбург области губернатори Денис Паслер Оренбург шаҳрида уйлари сув босиш хавфи остида бўлган аҳоли вакилларини эвакуация бўлишга чақирганди. У Урал ва Сакмара дарёси бўйидаги ҳудудларни сув босиш хавфи остидаги ҳудудлар сифатида келтирганди.

Оренбург шаҳри ва шу номли районда сув босиб бўлган ҳудудлар аҳолисини эвакуация қилиш ишлари олиб борилмоқда. Булар асосан дала ҳовлилардан иборат посёлкалардир.

Ҳудудда жами 865 киши эвакуация қилинган, 58 киши, жумладан 22 нафар бола вақтинча жойлаштириш марказларига олиб келинган.

«Оренбург Медиа» телеграм-канали маълумотига кўра, 10 апрел тонгида бир соат ичида Дубки посёлкасидан 30 киши эвакуация қилинган. Яна 13 кишини қутқарувчилар Дубовий плес посёлкасидан олиб чиқишган, аввалроқ бу ҳудуд аҳолиси эвакуациядан бош тортганди.

Оренбург мэрияси Заречний микрорайони чеккасидаги боғдорчилик жамиятидан икки киши қутқариб қолингани тўғрисида хабар берган. Сув босган ҳудуддан ўтаётган қутқарувчилар сув юзасида базўр турган ва ёрдамга чақираётган икки кишини кўриб қолишган.

Мэрия хабарида айтилишича, эркак ва аёл боғдорчилик жамиятига пуфлама қайиқда келишган, аммо уларнинг қайиғи симтўсиққа урилиб тешилган ва чўка бошлаганди.

Орскда сув чекина бошлаган

Бу вақтда Орск шаҳри ҳудудида Уралдаги сув сатҳи пасайишни бошлади — 10 апрел тонгида сув сатҳи 899 сантиметргача тушган. Апрел ойи бошида сув босган Орск ва унга ёндош аҳоли яшаш манзилларидан сув чекина бошлаган.

Ириклинский сув омборига сув қуйилиши кунига 259 кубга пасайган. 10 апрел тонгида бу сониясига 1226 куб метрни ташкил этаётганди, ундан сув чиқиши эса — сониясига 1342 куб метр.

Орск шаҳри мэри Виталий Козупицанинг сўзларига кўра, шаҳардаги 136 та турар жойда сув қолмаган. 6 793 та уй эса ҳамон сув босган ҳолатда қолмоқда.