Лондон Россиянинг Украинадаги йўқотишларини 450 минг киши атрофида баҳоламоқда

Британия Украинадаги урушда Россиянинг йўқотишларини 450 минг киши атрофида баҳолаяпти, улар ҳалок бўлган ёки яраланган. Бу маълумотни қироллик қуролли кучлари вазири Лео Докерти тақдим этди, деб ёзади 27 апрел куни UK Defence Journal.

Докерти Британия парламенти аъзоси Жон Хилининг Украинада жанг қилаётган россиялик ҳарбийлар сони ва Россия армиясининг йўқотишлари ҳақидаги саволига жавоб берди. «Бизнинг ҳисоб-китобларга кўра, 450 мингга яқин россиялик аскар ҳалок бўлган ёки яраланган, можаро бошланганидан бери яна ўн минглаб аскарлар фронтдан қочиб кетган», - дея вазирнинг жавобидан иқтибос келтиради UK Defence Journal. Унинг сўзларига кўра, Россиянинг хусусий ҳарбий компаниялари (ХҲК)да хизмат қилган ҳалок бўлган ҳарбийлар сони аниқ эмас. 

«Бизнинг ҳисоб-китобларга кўра, Украина томонидан 10 мингдан ортиқ рус зирҳли техникаси, шу жумладан 3000 га яқин асосий жанговар танклар, 109 самолёт, 136 вертолёт, 346 та учувчисиз учиш аппарати, 23 та барча тоифадаги денгиз флоти кемалари ҳамда 1500 дан ортиқ барча турдаги артиллерия тизимлари йўқ қилинган, ташлаб кетилган ёки қўлга олинган», деди вазир. 

Россия Украинадаги йўқотишларни ошкор қилмаяпти 

Россия ҳукумати Украинадаги армия йўқотишларини ошкор этмаяпти. АҚШ Марказий разведка бошқармаси бошлиғи Уилям Бернс 30 январ куни Американинг Foreign Affairs нашри учун ўзининг рукнида Россия армиясининг умумий йўқотишларини 315 минг киши деб баҳолаганди.

Апрель ойи бошида BBC рус хизмати ва «Медиазона» нашри журналистлари кўнгиллилар жамоаси кўмагида очиқ манбаларга асосланиб, ҳарбий ҳаракатлар бошланганидан бери ҳалок бўлган 50 016 нафар россиялик ҳарбийнинг исмини аниқлади.

ОАВ маълумотларига кўра, тасдиқланган йўқотишларнинг қарийб 18 фоизи маҳбуслар, 13 фоизи фронтга кетган кўнгиллилар ва 12 фоизи сафарбар қилинганлардан иборат. Журналистлар таъкидлашича, очиқ манбаларда барча ҳарбий ўлимининг ярмини ошкор қилиниши мумкин.