Часив Ярнинг шарқий қисми култепага айланган, Торецк зарба остида. Уруш суратлари

Украинада урушнинг 864-куни ўтди. Асосий маълумотлар:

• Краснодар ўлкасида дронлар ҳужуми оқибатида уяли алоқа минораси ҳамда нефт база шикастланди.
• Марин Ле Пен ўз партияси сайловларда ғалаба қозонган тақдирда, Украина француз қуроллари билан Россия ҳудудига зарба бериши тақиқланишини айтди.
• «ВКонтакте», РФ бош прокуратураси талаби билан, ўйлаб топилган Z-шоир Геннадий Ракитиннинг аккаунтини блоклади.
• РФ мудофаа вазирлиги Донецк областидаги Сокол қишлоғи эгаллангани ҳақида хабар берди.
• Россиялик курашчилар Париждаги Олимпиадада иштирок этишдан бош тортишди.
• Тергов урушда ҳалок бўлган генерал Олег Цоков 58-армиянинг собиқ қўмондони Иван Поповга қарши қўзғатилган ишга алоқадорлигини тасдиқлади.

Часив Ярда РФ қўшини томонидан эгалланган Канал райони

4 июл куни Украина мудофаа вазирлиги Донецк областининг Часив Яр шаҳри шарқидаги Канал микрорайонининг вайроналари акс этган фотосуратларни намойиш этди. Шу куни «Хортица» оператив қўшинлар гуруҳи расмий вакили Назар Волошин Украина қуролли кучлари мазкур ҳудуддан чекинганини маълум қилди — микрорайон тўлиқ вайронага айланган. Волошиннинг сўзларига кўра, бу ҳудудни ушлаб туришдан «маъно қолмаган»: «Бу ҳарбий хизматчилар ҳаёти ва соғлигига хавф туғдирарди». У Россия қўшини шаҳарда фаол ҳарбий ҳаракатларни тўхтатмаётганини қўшимча қилган.

Канал райони — Часив Ярнинг Северский Донец— Донбасс канали ортидаги шарқий қисми ҳисобланади. Тепаликларда жойлашган шаҳарни райондан сув тўсиғи ажратиб туради. Бу ҳудудда 2024 йил баҳоридан буён жанг кетмоқда. Ғарбдаги ҳарбий таҳлилчилар россияликлар бу жангларда катта йўқотишларга учраганини айтишган.

Торецк хавф остида

Сўнгги кунларда РФ қуролли кучлари Донецк областида янги юриш бошлаган. Кутилмаган ҳужум давомида улар Донецкдан шимолда жойлашган Торецк шаҳри атрофидаги ҳудудларни эгаллаб олган. Ижтимоий тармоқларда тарқалган видеолардан бирига кўра, Ҳорливка томондан юриш қилаётган рус қўшини Украина қуролли кучлари мудофаасига уч-беш километр масофада кириб келиб, Торецкдан шимоли-ғарбдаги Северне (собиқ Кирово) ва Дружба посёлкаларини ўз назоратига олган. Юриш Ҳорливка — Константиновка темирйўли бўйлаб амалга оширилмоқда ҳамда икки томондаги манбалар РФ қуролли кучлари штурмда украинларнинг таянч пунктлари остидан қазилган кўп километрлик туннелдан фойдаланганини айтишмоқда. Амалиётда қишда Авдийивканинг жанубий чеккаларида туннел қазиб ҳужумга ўтган Россия бўлинмалари ҳам иштирок этган.

Торецк атрофидаги бошқа йўналишда ҳам ҳужум қилинмоқда. Жануби-шарқда — Южное посёлкасида (собиқ Артемово) — Россия қўшини Украина мудофаасига бир неча километрга кириб келган. Бундан ташқари, шаҳардан шимоли-ғарбда жойлашган Ню Йорк посёлкасига ҳужум қилинмоқда. Ҳозирча бу ҳудудда фронт чизиғининг аниқ конфигурацияси юзага келмаган.

Донецк области полиция бошқармаси маълумотига кўра, ҳозирдаёқ Торецкдаги уйларнинг учдан бир қисми вайрон бўлган. Шаҳар аҳолисини эвакуация қилиш ишлари олиб борилмоқда. 1 июл ҳолатига кўра, эвакуациянинг дастлабки уч кунида Торецкдан 711 киши, жумладан 20 нафар бола олиб чиқилганди. Шаҳарда ҳамон 5 мингга яқин киши қолмоқда, обшинада жами 10 минг атрофида киши яшаган.

ДХРда номаълум аскарларнинг қолдиқлари қайта дафн этилиши

ДХРдаги Ясиноватая ўққа тутилиши

Ясиноватая — Донецк областининг 5 июл куни навбатдаги марта ўққа тутилган шаҳри. ДХР раҳбари Денис Пушилиннинг сўзларига кўра, ҳужум оқибатида 1946 ва 1964 йилларда туғилган икки аёл, шунингдек 1960 йилда туғилган эркак ҳалок бўлган. Россия томонидан тайинланган расмийлар зарбада Украина қуролли кучларини айблаган.