Хоразмда 7-синф қизи фарзанд кўрди. У мактаб ўқувчилари томонидан зўрлангани айтилмоқда

Тармоқларда Хоразмнинг Шовот туманида яшовчи 13 ёшли қизалоқ фарзанд кўргани ҳақида хабарлар тарқалди.

Вилоят мактабгача ва мактаб таълими бошқармасининг Kun.uz'га маълум қилишича, ҳолат ҳақиқатан ҳам ҳудуддаги мактаблардан бирида таҳсил олувчи 7-синф қизи билан содир бўлган. Ҳозирда жиноят иши қўзғатилиб, қиз билан бир мактабда ўқувчи 8- ҳамда 10-синф болалари гумонланувчи сифатида ишга жалб этилган.

Бошқармага кўра, қизча камгап ва ювош характерга эга, ўқиш давомида мактабнинг барча тартиб қоидаларига риоя қилган, бирор маротаба дарс қолдирмаган. Ўрганишлар давомида ўқувчи қиз доимий равишда ерга қараб, бошини кўтармай, ўта камгап ва тенгдошларига кам аралашган ҳолатда мактабга келиб юргани маълум бўлган.

Фаолияти давомида бепарво бўлгани сабаб мактабнинг иккита синфи раҳбарлари ҳамда мактаб психологи ишдан бўшатилган.

Болалар омбудсмани Сурайё Раҳмонованинг Kun.uz’га маълум қилишича ҳолат бўйича туман ИИБ ҳузуридаги тергов бўлими томонидан шу йил 19 июл куни Жоният кодексининг 128-моддаси 1-қисми (ўн олти ёшга тўлмаган шахс билан жинсий алоқа қилиш) билан жиноят иши қўзғатилган.

Иш юзасидан тергов ҳаракатлари давом этаётгани, айни вақт 13 ёшли қизнинг соғлиғи назоратдалиги, унга вазият юзасидан ижтимоий-ҳуқуқий кўмак кўрсатиш чоралари кўрилаётгани маълум қилинди. Қўшимча ахборот берилиши кутилмоқда.