Саноатнинг кескин ривожланиши бир томондан инсоният ҳаётини фаровон тарафга ўзгартирган бўлса, бошқа томондан атроф-муҳит ва табиат билан боғлиқ жуда жиддий муаммоларни келтириб чиқарди.
Жумладан, инсоният бугун бир томондан чўлланиш, бошқа томондан яшил ҳудудларнинг камайиб кетаётганидан азият чекмоқда.
Чўлланиш туфайли чанг-тўзонлар узоқ масофаларга учиб бораётган бўлса, яшил ҳудудлар камайгани туфайли бошқа муаммолар келиб чиқмоқда.
Шу кунларда интернет оламида Бразилиянинг Сан-Паулу шаҳрида яшовчи 73 ёшли одам жуда катта ҳудудга дарахт кўчатларини экиб, парваришлаб, боғ яратгани ҳақида хабарлар тарқалди.
Инсоният томонидан йўқ қилинаётган яшил ҳудудларни қайтаришга уринаётганлар биргина шу чол эмас. Саноқли бўлса-да бундай инсонлар бор ва улар дунёнинг турли чеккаларида дарахт экиб, парваришлашда давом этмоқда. Қуйида уларнинг бир нечаси ҳақида ҳикоя қиламиз.
Элио да Силва, Бразилия
Сан-Паулу шаҳри Бразилиядаги энг йирик, Ғарбий яримшардаги учинчи йирик шаҳар ҳисобланади. Бу ерда қарийб 12 млн, шаҳар атрофи билан ҳисоблаганда қарийб 20 млн одам яшайди.
Шаҳарнинг ўртасидан кичикроқ Тикуатира дарёси оқиб ўтади. Ўтган асрнинг охирроқларида бу дарё бўйи қаровсиз ҳолда, уйсизларга бошпана вазифасини ўтарди. Шунингдек, гиёҳвандлар уя қурган жой эди.
2003 йил тадбиркор Элио да Силва хотини билан дарё бўйида сайр қилиб юрганида ҳамма ёқ чиқиндига тўлиб ётганини кўради.
dailymail.co.uk
У дарё бўйини обод этишга қарор қилади ва у ерни чиқиндилардан тозалаб, турли дарахт кўчатларини олиб келиб эка бошлайди.
Орадан 8-10 йил ўтгач дастлаб экилган дарахтлар кўкка бўй чўзиб, дарё бўйи истироҳат боғига айланади. Бундан илҳомланган Элио дарахт экишда давом этади.
У 20 йил давомида 40 мингдан ошиқ дарахт кўчатларини экади. Элио дарахт экиш ва уларни парваришлаш учун ҳар йили 8-10 минг доллардан харажат қилади.
Натижада узунлиги 3,2 км, эни 100 метр бўлган жойда ажойиб боғ барпо бўлади. Бугун Элионинг боғида 160 хил турли дарахт ва буталар ўсиб турибди.
