«Интер» ва «Арсенал» Чемпионлар лигасиа яхши старт олиб, уч турда еттитадан очко жамғарди. Бу топ-8 га кириш учун яхши имконият. Аммо жамоаларни ўзаро учрашув кутаётганди.
Биринчи бўлим бироз ғалати кечди. Энг қизиқарли воқеалар илк ва охирги дақиқаларда кузатилди. Бўлимнинг катта қисмини эса «Интер» ва «Арсенал» майдон марказидаги кураш билан ўтказди. Иккинчи дақиқада Дензел Думфрис қулай имкониятни қўлдан чиқарди: нидерландиялик ҳимоячи жарима майдони марказида туриб тўпни дарвоза тўсинига қарата йўллади.
Кейин эса «тактик ўйинлар» бошланиб кетди. Симоне Индзаги ҳам, Микел Артета ҳам шогирдларидан ўз жарима майдонида вазиятлар яратилишига йўл қўймасликни талаб қилишди. Лекин бу жамоалар ҳужумга ўтмаганини англатмайди. Маҳди Торимий «Арсенал» дарвозаси томон хавф солиб турди, Букайо Сака эса вақти-вақти билан ўнг қанотидан хавфли ёриб киришларни амалга оширди. Аммо энг муҳим эпизод 45+1-дақиқага бориб рўй берди.
Бўлим охирида Ҳоқон Чалхонўғлининг узатмаси жарима майдони ичидаги Торимийга етиб борди. Эронлик ҳужумчи дарвозага орқа турган ҳолда тўпни Микел Меринонинг қўлига теккизди. Ҳакам Иштван Ковач иккиланмасдан «нуқта»ни кўрсатди ва Чалхонўғли совуққонлик билан зарба бериб, ҳисобни очди – 1:0. Индзаги иккинчи бўлим учун қулай сценарийга эга бўлди.
Иккинчи бўлимни «Арсенал» ҳужумлар ёмғири билан бошлади: «Интер» ҳисобга ўйнади ва ўта прагматик ҳаракатланди. Бурчак зарбасидан кейин Вилям Салибада яхши имконият бўлди, аммо у тўпга тўғри зарба бера олмади. Кейин эса Думфрис дарвоза тўрига бораётган тўпни чизиқ устида қайтариб қолди. Бошқа ҳужумда Кай Ҳаверц тўпни дарвозабон устидан ошириб қўймоқчи бўлди, аммо Зоммер тўпга бир амаллаб улгурди. Германиялик ҳужумчининг бошқа зарбасидан кейин дарвозабон ожиз қолганди, аммо ҳимоячи Янн Биссекк тўп йўлини тўсиб чиқди.
Мавзуга оид
Бўлим ўрталарида Симоне Индзаги футболчиларни алмаштириш орқали жамоасини янгилади: аввалига Мхитарян, Тюрам ва Барелла, кейинроқ — Димарко ўйинга қўшилди. Аммо «Интер»нинг ўйини ўзгармади — жамоа чуқур ҳимояланди ва фақат қарши ҳужумларга таянди. Эдегорсиз ўйнаётган «Арсенал»нинг ҳужумларида эса ранг-баранглик етишмади ва тўп фақат юқоридан жарима майдонига етказиб берилди. Индзаги жамоаси бундай сценарийда ўзини жуда ишончли ҳис қилди. Бурчак зарбалари бўйича 0:13 ва дарвоза соҳасига тўғри борган зарбалар бўйича 1:4 (жами зарбалар 7:20) ҳолатида ҳам. «Интер» жарима майдонига тўхтовсиз узатмаларнинг барчаси бесамар кетди.
Ўйин охирида «Арсенал» тўлиқ куч билан олдинга ташланди, аммо «Арсенал» барибир миланликлар деворидан ўта олмади ва рақиб уч очкосини сақлаб қолди. Лондонликлар АПЛда қаторасига уч турда ғалаба қозона олмаганди, энди эса коллекцияга Чемпионлар лигасидаги илк мағлубият ҳам қўшилди. Артетада кичик инқироз кузатилмоқда.
«Барселона» мудофааси чизиғини жуда олдинда жойлаштириш билан таваккалчилик қилишда давом этмоқда ва «Црвена Звезда»нинг тезкор голи офсайд туфайли бекор қилинди. Бу Ҳанси Флик жамоаси рақиблари юзинчи марта (!) ўйиндан ташқари ҳолатда қолиши бўлди. Кейин эса ўйин кутилган сценарий бўйича кетди ва Рафиня жарима нуқтасидан ошириб берган тўпни Иниго Мартинес бош билан дарвоза тўрига йўллади. Бу голдан кейин барча каталонлар ҳисобни йириклаштиришига тайёргарлик кўра бошлади, аммо серблар ҳисобни тенглаштирди, Крунич тўпга бир тегинишда Силасни дарвозабон билан яккама-якка ҳолатга чиқарди. Бу сафар Мартин орқада қолиб кетгани учун меҳмонларнинг офсайд қопқоғи иш бермади.
Фаворит кўпроқ куч сарфлашига тўғри келди ва Левандовски иккинчи уринишида дарвоза тўрини ишғол қилди, Рафинянинг зарбасидан кейин тўп устундан унинг оёғига қайтиб келганида унга ҳеч ким халал бермади. Ушбу поляк ҳужумчиси Белграддаги ушбу стадионда ЕЧЛ доирасидаги ўйинларда мезбонлар дарвозасига энг кўп гол урган футболчидир. Иккинчи бўлим бошидаги иккинчи голидан кейин Левандовски Сербия пойтахтидаги ўйингоҳда урган голлари сонини олтитага етказди, «Звезда» дарвозасига урган жами голлари сонини — еттитага. Роберт бошқа ҳеч бир клубни бу қадар кўп ранжитмаган.
Бу мавсумда у каби Рафиня ҳам сермаҳсул ҳаракат қилмоқда ва Месси даврини ёдга олмоқда. Гап шундаки, бразилиялик вингер жорий йил бошидан буён Чемпионлар лигасида саккиз гол уриб улгурди ва кўк-анорранглиларда бундай сермаҳсуллик сўнгги беш йил давомида, Лео ўйнаган даврдан буён кузатилмаганди. Ҳимоячи Кунде эса ассистентлар бўйича ҳет-трик қилгани бўлди. Танаффусдан кейин сочилиб кетган «Звезда» эса ўйин охирида Милсоннинг айланма зарбаси билан ҳисобни бироз қисқартирди.
Бу ўйиндаги яна бир эътиборли ҳолат 64-дақиқада каталонияликларнинг 17 ёшли ҳимоячиси Пау Кубарсининг юзи қонга беланиши бўлди.
Урош Спайич унинг юзига бутсасининг остки қисми билан зарба берди ва шифокорлар майдонга чиқиб келишди. Ўйиндан кейин унинг юзига ўнта чок тушгани маълум қилинди.
Неймар, Месси ва Мбаппе билан бирин-кетин хайрлашган, шу билан бирга, таркибни ёшартиришни бошлаган «ПСЖ» Чемпионлар лигасининг бу мавсумига умуман тайёр эмаслиги кўриниб қолди. Аниқроғи — топ-ўйинлар кўпайган янги форматга. Қолаверса, юлдузли таркибга эга бўлмаган рақиблар ҳам қийинчилик туғдирмоқда. Таркибидаги асосий етакчиларни сотиб юборгач, бу мавсумни ўта муваффақиятсиз ўтказаётган «Жирона» билан 1:0 (қўшимча дақиқаларда дарвозабон Гассанига номига ёзилган автогол). Кейин — ПСВ билан уйдаги дуранг (1:1). Ўз даражасидаги рақиблар билан ўйинларда эса ҳозирча очколар йўқ, аввалига «Арсенал» майдонида 0:2 ҳисобида ютқазган Луиса Энрике жамоаси «Атлетико» билан ўйин охирида гол ўтказиб ютқазди.
Ҳолбуки барчаси ажойиб бошланганди ва мадридликларнинг қўпол хатоси Дембеле ва Заир-Эмери ҳисобни очувчи голни ташкиллаштиришига олиб келганди. Лекин Диего Симеоне жамоаси тезда жавоб қайтарди, жамоадаги аргентиналиклар — Де Паул, Жулиано Симеоне, Алварес иштирокидаги комбинация якунида Гризманн яна бир аргентиналик Молинани голли пас билан таъминлади.
Қўшимча дақиқаларда идеал жокер Корреанинг голи эса «ПСЖ» учун шафқатсизлик бўлди. Доннарумма ўзи турган жойга йўлланган ва у қадар кучли бўлмаган зарбани ўтказиб юборди.
Бунгача Франция чемпионларида ғалаба қозониш учун етарлича имкониятлар бўлганди, зарбалар статистикаси 22:4 кўринишини олди, аммо уларнинг барчаси йўққа чиқарилди, Маркинос бир неча метр масофадан туриб тўпни дарвозабоннинг ўзига йўллади. Бу Луис Энрике учун «Атлетико»дан учралган учинчи мағлубият. Унинг карьерасида бундан ҳам ноқулайроқ рақиб — фақат «Атлетик» (тўрт мағлубият). Парижликлар умумий жадвалда 25-ўринга тушишди, жамоанинг қолган турлардаги рақиблари — «Бавария» (сафар), «Манчестер Сити» (уй), «Штутгарт» (сафар) ва «Залсбург» (сафар).
Уч турдан кейин ўзи учун камтарона тўрт очкога эга бўлиб турган «Бавария» ўз ўйинини қолганлардан анча кечроқ бошлади. Метро кечикиши туфайли барча мухлислар стадионга етиб кела олмагани инобатга олиниб, ўйинни ўн беш дақиқа кеч бошлашди. Ўйин бошлангач эса бундеслигада рақиблари дарвозаларига армонсиз гол ураётган мюнхенликлар «Бенфика» ҳимоясидан ўта олмади.
Фақат иккинчи бўлим ўрталарига бориб «бургутлар»ни таслим этишнинг уддасидан чиқилди, баварлар бурчак зарбаси ижро этилганида ҳужумни иккинчи темпда давом эттирди ва Саненинг узатмасига етиб борган Кейн тўпни Мусиалага ташлаб берди. Бу ғалаба Венсан Компанига вазиятни бироз яхшилаш имконини берди. Олдинда «ПСЖ»га қарши қийин ўйин кутмоқда, аммо кейин «Шахтёр», «Фейеноорд» ва «Слован» каби очко олиш осон бўлган рақиблар кутади. Охирги икки жамоага қарши ўйинлар январда бўлиб ўтади.
Дам олиш кунлари «Аталанта»нинг «Наполи» устидан ғалабасини (3:0) Лукманнинг икки голи таъминлаганди, икки ҳолатда ҳам нигериялик футболчига Де Кетеларе ассистентлик қилганди. Штутгартда Жан Пиеро Гасперини белгияликни захирада қолдирди ва бу қарор ҳам биринчи бўлимда ҳисоб очилмаслигига таъсир кўрсатди дейиш мумкин. Танаффусдан кейин Де Кетеларе майдонга чиқди ва ажойиб юриш амалга ошириб, тўпни Лукманнинг оёқлари остига ташлаб берди.
Бу бергамоликларга ҳисоб учун ўйнаш имконини берди, ўйин охирида эса Дзаниоло олдинга чиқиб кетган мезбонларни жазолади. Гасперини модели яхши ишламоқда. Биринчидан, бу турнирда «Интер»дан ташқари фақат «Аталанта» ҳамон ўз дарвозаси дахлсизлигини сақлаб қолмоқда. Иккинчидан, бу жамоа ушбу турнирда ўндан ортиқ ўйин ўтказган жамоалар орасида сафардаги ғалабалар бўйича энг яхши кўрсаткич қайд этмоқда (13 ўйинда 7 ғалаба).
«Брест»нинг илк турлардаги муваффақияти жамоада ўзига ишонч уйғотди ва Прагада меҳмон бўлган французлар ҳужумкор ўйин кўрсатди. Аввалига Думбия ноқулай ҳаракати билан юз фоизлик имкониятни йўққа чиқарган бўлса, бурчак зарбасидан кейин жарима майдонидан қайтиб чиққан тўпни Фернандеш идеал зарбаси билан голга айлантирди.
Иккинчи бўлимда эса «Спарта» дарвозабони прессинг остида хатога йўл қўйиб, тўпни Ажоркнинг оёғига ташлаб берди, у эса Кайриненни автогол уришга мажбур қилди. Энди «Брест» — уникал натижа қайд этмоқда: «Астон Вилла»нинг мағлубиятидан кейин французлар Чемпионлар лигаси номли турнирда (1992 йилдан буён) бирор марта ютқазмаган ягона жамоа бўлиб қолмоқда. Тўғри, Эрик Руа жамоасида ҳали атиги тўрт ўйин ўтди, аммо бу баҳслашиб бўлмайдиган аниқ рақамлар.
«Астон Вилла»да «Борнмут» билан ўйиндаёқ ғалабани қўлдан чиқарганида (1:1) кичик инқироз аломатлари кўзга ташлана бошлаганди. Кейин эса бирмингҳемликлар «Кристал Пэлас»га ютқазиб, Лига кубогидан чиқиб кетишди ва АПЛ доирасида «Тоттенҳэм» майдонида 1:4 ҳисобида ютқазишди. Брюггеда ҳам барчаси қийин бошланди, биринчи бўлим давомида жамоани устун ва Эмилиано Мартинеснинг сейвлари ЕЧЛдаги илк голдан сақлаб турди. Аммо иккинчи бўлим бошида муқаррар иш барибир содир бўлди, «Вилла» бу голни Ванакен аниқ ижро этган пеналтидан ўтказди.
Аммо меҳмонлар бунда фақат ўзини айблаши мумкин, бу 11 метрлик зарба аҳмоқона ҳолатда белгиланди. Шу куни ЕЧЛда дебют қилган Тайрон Мингс тўпни ўйинга киритиш вақтида Мартинесдан пас қабул қилиб олганида тўпни такроран ўйинга киритиш керак деган фикрга келди (у катта эҳтимол билан тўп дарвозабон майдони чизиғидан ўйинга киритилиши керак деб ҳисоблаган) ва уни қўллари билан чизиққа олиб келиб жойлаштирди.
Ҳолбуки, қоидаларга кўра, тўпни исталган нуқтадан ўйинга киритиш мумкин эди.
Германиялик арбитр Тобиас Штиллер бу ҳолатни жарима майдони ичида қўл билан ўйнаш сифатида қайд этиб, пеналти белгилади. VAR бунга қўшилди. Буни футбол тарихидаги энг аҳмоқона пеналти деб ҳисоблаш мумкин.
«Фейеноорд» Лиссабонда «Бенфика» устидан ёрқин ғалабага эришганидан кейин мавсумни ўта ёмон ўтказаётган «Залцбург»нинг тақдири ҳал бўлгандек кўринганди. Лекин Роттердамдаги ўйинда меҳмонларнинг омади келди. Мезбонлар дарвозабони Велленройтером тўпни ўйинга киритишда йўл қўйган хато меҳмонларнинг ҳужумини бошлаб берди ва Глухнинг узатмасидан кейин Конате бош билан зарба йўллаб ҳисобни очди. Ивуарлик футболчи иккинчи бўлим бошида яна бир гол уриб, нидерландларни карахт аҳволга солди.
Табиийки, «Фейеноорд» таслим бўлмади ва бир киши кам бўлиб қолганига қарамай, жавоб қайтарди. Ҳаж Мусса ҳимоячини алдаб ўтиб, ўткир бурчакдан чиройли гол урди. Фақат шу куни қон исини олган «Залцбург»ни тўхтатиб бўлмади. Конате пеналтидан фойдалана олмаган бўлса-да, кейинги ҳужумда учинчи гол урилди. Гиндо тўсин остига йўллаган кучли зарбаси билан жамоа ўзига кела бошлаганини намойиш этиб берди.
Уч турда бирор ғалабаси йўқ жамоаларнинг ўзаро тўқнашувида «Шахтёр» «Янг Бойз»га қараганда омадлироқ чиқди Швейцарлар ҳисобни очишганди, аммо рақибга биринчи бўлимнинг ўзидаёқ вазиятни ўнглашга имкон берди, иккинчи бўлимда эса украинлар ғалабали ҳисобни сақлаб қолишди.
Кун статистикаси
«Интер» яримҳимоячиси Ҳоқон Чалхонўғли фаолиятида илк бор ЕЧЛда қаторасига 2 гол урди.
«Брест» асосий еврокубокдаги дастлабки тўрт ўйинида 9 гол урди — бу француз клублари учун «Нант»нинг 1966 йилги дебютидан буён энг яхши натижа.
«Фейеноорд» — «Залцбург» ўйини бошланғич таркибидан 18 мамлакат вакиллари ўрин олди, бу эса турнир рекорди саналади.
18 ёшу 243 кун — «ПСЖ» яримҳимоячиси Заир-Эмери парижликларнинг асосий еврокубок доирасида «Парк де Пренс»да гол урган энг ёш футболчига айланди, у Мбаппенинг натижасини яхшилади.
Луиса Энрике ЕЧЛдаги ўйинларининг 44 фоизида мағлубиятга учради (16 ўйиндан 7 тасида) — бу «ПСЖ» учун қатарлик ҳомийлар давридаги энг ёмон натижаси.
«Барселона» ўз тарихида илк бор мавсум бошидаги 16 ўйинда 55 гол урди. Олдинги энг яхши натижа 1950 йилдан буён сақланиб турганди.
