Британияда одамларнинг ДНК маълумотларини сақлаб келган компания изсиз йўқолди

Буюк Британияда ДНК-тестлари бўйича хизмат кўрсатувчи Atlas Biomed компанияси мижозларини ўзида мавжуд махфий маълумотлар тақдири нима бўлгани ҳақида огоҳлантирмай, фаолиятини тўхтатди, деб хабар беради BBC.

Лондонда офиси бўлган Atlas Biomed компанияси инсонларнинг генетик тузилиши, шунингдек, уларнинг ирсида қандай касалликлар борлигини аниқлаш бўйича хизматлар кўрсатиб келган. Аммо фойдаланувчилар энди онлайн режимда ўзларининг шахсий маълумотларини кўра олмайди — компания ҳолатга ҳеч қандай изоҳ бермай, изсиз йўқолди.

Компания мижозлари вазиятдан «қаттиқ хавотирда» ва ўзларининг шахсий маълумотлари тақдири нима кечгани ҳақидаги саволларга жавоб олишни истамоқда. Ахборот комиссари бошқармасига (ICO) Atlas Biomed’га нисбатан билдирилган шикоятларни қабул қилганини тасдиқлади. «Одамлар ташкилот уларнинг шахсий маълумотларидан хавфсиз ва масъулият билан фойдаланишларини кутишга ҳақли», — дейилади баёнотда.

Эссекс графлигида яшовчи Лиза Топпинг исмли аёлнинг айтишича, у бир неча йил олдин генетик хулоса олиш учун 100 фунт стерлинг тўлаб, Atlas Biomed’га ўз сўлаклари намунасини юборган. Унинг ўзига тегишли профилга ДНК натижаларидан ташқари, қандай касалликлар билан оғригани ва ҳатто олган жароҳатлари бўйича ҳам маълумотлар киритилган. Аёл сайт изсиз йўқолишидан олдин вақти-вақти билан онлайн анкетасини кузатиб турган. 

«Бегона инсонлар ушбу маълумотлардан қандай фойдаланишлари мумкинлигини билмайман, аммо бу ўта шахсий маълумотлар… Улар ғойиб бўлганини билганимдан кейин ўзимни ноқулай ҳис қилишни бошладим», — дейди Лиза.

Компания билан боғланиш учун кўрсатилган телефон рақам ўчиқ. BBC унинг Лондондаги офисига бориб кўрган, аммо Atlas Biomed’нинг ҳеч қанақа изини топа олмаган. 11 мингдан зиёд обуначига эга Instagram саҳифаси эса 2022 йил мартдан бери янгиланмаган.