Ўзбекистон ва Швейцария шартномавий-ҳуқуқий базани кенгайтиришга келишиб олди

Онлайн форматда икки давлат Ташқи ишлар вазирлигининг тегишли бошқармалари раҳбарлари иштирокида Ўзбекистон-Швейцария сиёсий маслаҳатлашувларининг еттинчи давраси бўлиб ўтди.

ТИВ маълумотига кўра, Ўзбекистон билан Швейцария ўртасидаги турли соҳалардаги кўп қиррали муносабатларнинг ҳолати ва янада ривожлантириш истиқболлари муҳокама қилинди.

Савдо-иқтисодий, сармоявий, молиявий-техникавий ва маданий-гуманитар соҳаларда, шунингдек, халқаро ташкилотлар доирасида ўзаро манфаатли ҳамкорликни мустаҳкамлашга алоҳида эътибор қаратилди.

Томонлар турли даражадаги ўзаро ташриф ва тадбирларни биргаликда ривожлантириш, икки томонлама муносабатларнинг шартномавий-ҳуқуқий базасини кенгайтириш, шунингдек, сиёсий маслаҳатлашувларнинг навбатдаги даврасини 2025 йилда Берн шаҳрида ўтказишга келишиб олдилар.

Ўзбекистон ва Швейцария ўртасидаги дипломатик муносабатлар 1992 йил 7 майда ўрнатилган.

#Швейцария #маслаҳатлашув