Ўзбекистон ва Қозоғистон мавсумий мева-сабзавотларни ўзаро етказиб беради

Ўзбекистон элчиси Бахтиёр Ибрагимов Олмаота вилояти акими Марат Султангазиев билан учрашув ўтказди.

Мулоқот чоғида қишлоқ хўжалиги, саноат, туризм, савдо соҳаларидаги ҳамкорликни ва маданий-гуманитар алоқаларни фаоллаштириш масалалари муҳокама қилинди.

Суҳбатдош мамлакат ҳудудлари билан савдо-иқтисодий ҳамкорлик изчил ривожланиб бораётганини ва жорий йилнинг дастлабки саккиз ойида Олмаота вилоятининг Ўзбекистон билан ўзаро савдоси 171 миллион АҚШ долларни ташкил этганини таъкидлади.

Учрашув якунида мавсумий мева ва сабзавотларни ўзаро етказиб бериш, сут маҳсулотлари ва қадоқлаш материалларини биргаликда ишлаб чиқаришни ташкил этиш, Олмаота вилояти делегациясининг Қашқадарё вилоятида ўтказиладиган Kashkadarya invest – 2024 бизнес-форумида иштирок этишни уюштириш ва бошқалар тўғрисида келишиб олинди.