«Афросиёб» тезюрар поездлари 7 декабрдан Хивага қатнай бошлаши рад этилди

«Ўзбекистон темирйўллари» АЖ 7 декабрдан Хива шаҳрига «Афросиёб» поездлари қатнови йўлга қўйилиши тўғрисида тарқалган хабарларни рад этди.

Ижтимоий тармоқларда 7 декабрдан Хива шаҳрига юқори тезликда ҳаракатланувчи «Афросиёб» поездлари қатнай бошлагани ҳақида маълумотлар тарқалмоқда. «Ўзбекистон темирйўллари»нинг маълум қилишича, ушбу маълумотлар ҳақиқатга тўғри келмайди.

Таъкидланишича, Бухоро—Урганч—Хива темирйўл участкасини электрлаштириш ишларини якунлаш доирасида битта юқори тезликда ҳаракатланувчи «Афросиёб» поезди синовдан ўтказилган.

«Ушбу босқич янги маршрутни синовдан ўтказиш ва инфратузилманинг тўлиқ фойдаланишга тайёрлигини текшириш дастурининг бир қисмидир.

Биз барча ижтимоий тармоқлар фойдаланувчиларини бундай турдаги маълумотларни олиш ва тарқатишда эҳтиёт бўлишга чақирамиз», — дейилади хабарда.

Бухоро ва Хива шаҳарлари ўртасида тезюрар Афросиёб поезди қатнови йўлга қўйилиши тўғрисида 2021 йилда хабар берилганди. Ўшанда Осиё тараққиёт банки Ўзбекистон ғарбидаги йирик шаҳар марказларини боғловчи 465 километрлик темирйўл линиясини электрлаштириш, темирйўл хизматларини яхшилаш ҳамда минтақада савдо ва туризмни ривожлантириш учун 162 миллион долларлик кредит ажратилишини маъқуллаган эди.