Ню-Йоркда полиция АҚШдаги энг йирик тиббий суғурта компанияларидан бири UnitedHealthcare ижрочи директори — 50 ёшли Брайан Томпсонни отиб кетган эркакни қидиришни давом этмоқда.

Қотиллик 4 декабр куни маҳаллий вақт билан соат 07:00 ларда Манхэттен марказида содир бўлди. Ню-Йорк полицияси комиссари Жессика Тишнинг сўзларига кўра, қуролланган ниқобли эркак Томпсонни Hilton Midtown меҳмонхонаси яқинида кутиб турган — бу ерда суғурта компанияси инвесторларининг конференцияси бўлиб ўтиши керак эди. CNN ихтиёрига келиб тушган видеога кўра, Томпсон меҳмонхонага яқинлашганида капюшон ва кулранг рюкзакда бўлган эркак унинг ёнида пайдо бўлади ва орқасидан ўқ узади. Томпсон ҳужум уюштирган шахсга ўгирилишга улгуради, аммо кейин ерга йиқилади. Жиноятчи унга яқинлашиб, яна бир неча бор тепкини босади.

Қочиб кетаётган жиноятчини Амар Абдулмула исмли такси ҳайдовчиси суратга олишга муваффақ бўлган. Унинг сўзларига кўра, ҳужум уюштирган шахс овоз сўндиргич ўрнатилган пистолетдан ўқ узган. Амар уни кўчадан югуриб ўтаётганида кўриб қолган. ABC News билан суҳбатда у гумонланувчини бўйи 185 сантиметрга етадиган, озғиндан келган эркак деб таърифлади.

Қотилликка нима сабаб бўлгани ҳозирга қадар номаълум, аммо полицияга кўра, бу «қасддан, олдиндан режалаштирилган ҳужумдир». CNN’нинг терговга яқин манбаларининг таъкидлашича, ҳужум уюштирган шахс ўқ узганидан кейин кўчанинг қарама-қарши тарафига ўтган, хилват жойга яширинган ва электровелосипед ҳайдаб кетган. Уни охирги марта Марказий боғ ҳудудида кўришган.

Полициячилар ҳудудни текшириб чиққан, аммо на велосипед, на қурол топилган. Улар қотил қочаётганида тушиб қолдирган дея тахмин қилинаётган сув идиши ва телефонни топган. Полиция вакилининг айтишича, Starbucks кафеси камераси ёзиб олган видеода ҳужум уюштирган шахс суиқасддан тахминан ярим соат олдин сув ва иккита батончик сотиб олгани тасвирланган. Полиция ўқ узган эркакнинг шахсига аниқлик киритиш мақсадида топилган телефонни блокдан чиқаришга уринмоқда. Гумонланувчини топишга ёрдам берган ҳар қандай маълумот учун 10 минг долларгача мукофот эълон қилинган.