Манчестердаги омадсизлар дербисида ким омадлироқ чиқади? Ҳафта ўйинлари анонси
|22:27 / 14.12.20244 27214 мин
Еврокубоклар тугаб улгурмай, чемпионатлардаги навбатдаги тур ўйинлари бошлаб юборилди. Италияда турнинг марказий ўйинларидан бири бўлиб ўтса, эртага Манчестерда омадсизлар дербиси бўлиб ўтади. «Атлетико» эса ғалабали сериясини давом эттириши учун навбатдаги синовни аъло баҳога топшириши керак бўлади.
Ҳозирча Англия чемпионатида «Ноттингҳем Форес» энг асосий кашфиётлардан бири бўлиб турибди – 15 турдан кейин Чемпионлар Лигаси йўлланмасини берувчи ўринлардан бирини эгаллаб туриш айниқса АПЛда жуда қийин. Ўтган турда «Олд Траффорд»да ғалаба қозонган Нуну Эшпириту Санту шогирдлари бу ишни уддалашмоқда. Албатта, турнир жадвалидаги тиғизликни ҳам инобатга олиш керак, масалан, 10-ўриндаги «Фулҳэм» атиги 2 очко жамғарган холос. Бирминҳэмликлар ҳисобида эса, худди «ўрмончилар» каби 25 очко бор.
Албатта, Эмери жамоасидан яхшироқ натижа кутишга ҳақли эдик. Аммо худди ўтган йилги «Нюкасл» каби бир неча фронтда курашиш «Вилла»га ҳам қийинчилик туғдиряпти. Айниқса, охирги ой жамоа учун оғир келди – «Астон Вилла» барча мусобақаларда қаторасига саккиз ўйинда ғалаба нималигини билмади. Фақат сўнгги уч ўйиндаги ғалаба жамоанинг ҳам Англия чемпионати, ҳам Чемпионлар Лигаси жадвалидаги ҳолатини бироз бўлса-да яхшилаб берди. Эмери жамоаси айни пайтда Чемпионлар Лигаси умумий жадвалида 5-ўринда боришмоқда. Агар «Монако» ва «Селтик»ка қарши ўйинлардан бирини ўз фойдасига ҳал қилса, «Астон Вилла» кучли саккизликка кириши ва тўғридан тўғри нимчорак финалда иштирок этиш имкониятини қўлга киритиши мумкин. «Манчестер Сити», «Реал», «ПСЖ», «Арсенал» каби жамоалар айни пайтда саккизталикка кира олмаётган пайтда бирминҳэмликларнинг бу натижаси албатта таҳсинга лойиқ.
«Астон Вилла» бундан кейинги ўйинларни «Манчестер Сити», «Нюкасл» ва «Брайтон» каби жамоаларга қарши ўтказади. Табиийки, боксинг-дэй олдидан юқори ўринларда қолиш учун айниқса, бугунги ўйинни ғалаба билан якунлаши шарт. Ўз навбатида «Ноттингҳем»нинг ҳам тақвими осон эмас. Нуну шогирдлари кейинги ўйинни ўз майдонидаги ўйинларда деярли юз фоизлик натижа қайд этаётган «Брентфорд»га сафар қилишса, сўнг «Тоттенҳэм»ни қабул қилишади.
Жароҳатларга келсак, мезбонлар сафида Данило ва Сангаре шерикларига ёрдам бера олишмайди. «Астон Вилла» эса Леон Бэйли, ҳамда Рэмзининг ёрдамидан фойдалана олмайди. Ўтган мавсумда бўлиб ўтган ҳар икки ўйинда мезбон жамоанинг қўли баланд келган. 2018 йилнинг ноябрида эса бу икки жамоа Чемпионшипда бўлган ва ўша мавсумдаги учрашувда 5:5 ҳисоби қайд этилганди.
АТЛЕТИКО – ХЕТАФЕ (15 декабр, 18:00)
Агар турли тактик курашлар ёки дриблинглардан зерикиб, майдонда ҳақиқий кураш томоша қилмоқчи бўлсангиз, ушбу ўйинга «ташриф буюришингиз» керак бўлади. Пепе Бардалас қайсидир маънода Диего Симеоненинг издоши ҳисобланади ва унинг жамоаларини доим енгиш қийин. Агар кўпроқ югуриб, кўпроқ кураш таклиф этмасангиз, осонликча натижага эришиб бўлмайди. Бунинг устига ушбу ўйин Мадрид дербиси ҳисобланади. Айнан шу стадионда ўтган охирги 5 учрашувнинг иккитаси дуранг билан якунланиб, қолган уч ўйинда ҳам «Атлетико» фақат минимал ҳисобда ғалабага эришгани бу сафар ҳам бизни муросасиз баҳс кутиб турганига далолат қилади. Айниқса, икки йил аввалги дерби эсингизда бўлса керак, ўйин давомида ҳисобда орқада ҳам борган мезбонлар ғалаба голини сўнгги дақиқаларда уриб 4:3 ҳисобида устун келгандилар.
Мавзуга оид
Асосий эътибор «Реал» ва «Барселона»га қаратилган бир пайтда қаердандир «Атлетико» ҳам чемпионлик пойгасига қўшилгани бежиз эмас. Асосий таркибни номлар бўйича олганда балким Симеоне ихтиёрида биринчи рақамли юлдузлар камдир, аммо жамоанинг фишкаси бошқа – «Атлетико» деярли 2 таркибга эга. Мураббий ушбу футболчилар билан бемалол ротация қилиши ёки эртароқ алмаштиришлар билан ўйинда бурилиш ясаши ҳам мумкин. Статистикага кўра, «Атлетико» сафида энг кўп майдонга тушган 10 футболчи умумий вақтнинг 63 фоизини майдонда ўтказган экан холос. Бу жуда зўр кўрсаткич. Айнан шу туфайли «Атлетико» айниқса иккинчи таймларни жуда кучли ўтказмоқда. Жамоа агар фақат 2 таймларни эътиборга олинса, 16 ўйиндан 13 тасини ўз фойдасига ҳал қилган. Айни пайтда «Атлетико»нинг барча мусобақалардаги ғалабали серияси 10 учрашувга етди. Мадридликлар Чемпионлар Лигасидаги оғир аҳволдан 11-ўринга кўтарилиб, ҳатто саккизлик учун жуда яхши имконият хосил қилган бўлса, Ла Лигада йўқотилган очколар бўйича пешқадамдан «Реал»дан атиги бир очко кам жамғарган. Масалан, «Барселона»нинг юқорида тилга олинган кўрсаткич бўйича статистикаси – 85 фоиз. Айнан шунинг учун ҳам сўнгги ўйинларда «Барселона» сўнгги дақиқаларда ғалабаларни бой бериб қўймоқда. Флик етарлича ротацияларни амалга ошириш имконияти деярли йўқ.
«Хетафе»га келсак, жамоа айни дамда аутсайдерларга яқинроқ. Сўнгги турда атиги учинчи ғалабасига эришди. Юқорида «Атлетико» билан сўнгги ўйинлардаги статистикалар келтирилди, аммо яна бир жиҳат – жамоа «Атлетико»ни 27 ўйиндан бери юта олмай келмоқда. Аммо «Хетафе»нинг характери айнан қийин вазиятларда янаям қаттиқроқ қаршилик кўрсатишга моликроқ.
Таркибларга келсак, мезбонларда йўқотишлар йўқ. Айтилганидек, айнан ротация ва кучларни тўғри тақсимлай олиш «Атлетико»га жароҳатларни ҳам четлаб ўтишда ёрдам беряпти. «Хетафе»га эса Борха Майорал ёрдам бера олмайди. Шунингдек, Мауро Арамбарри «Эспаньол» билан ўйинда навбатдаги сариқ карточкасини олиб, ушбу ўйинга дисквалификация қилинган.
МАНЧЕСТЕР СИТИ – МАНЧЕСТЕР ЮНАЙТЕД (15 декабр, 21:30)
«Манчестер Сити» барча мусобақалардаги охирги 10 ўйинда атиги бир марта «Ноттингҳем Форест» устидан ғалаба қозонди. Етти ўйинда мағлубиятга учради. «Шаҳарликлар» араб шайхлари томонидан сотиб олинганидан буён, Гвардиола эса умуман мураббийлик фаолиятида бунақа даражадаги инқирозга юз тутмагандилар. Ушбу 10 учрашувда «Манчестер Сити» ўз дарвозасидан 23 маротаба тўп олиб чиқди. Кучли бешликдаги ҳеч қайси жамоа кўпроқ гол ўтказмаган.
Агар «Манчестер Сити»нинг ҳолатини тасаввур қилган бўлсангиз, энди, «Манчестер Юнайтед» рақибидан 7 очко кам жамғарган, уёғини тушуниб олаверинг. Клуб аллақачон мураббийини ҳам, спорт директорини ҳам алмаштириб улгурди. Рубен Аморим айни дамда илиқ таассурот қолдираётган бўлса-да, у ҳам вазиятни ўнглаш учун кутилганидан кўпроқ вақтга эҳтиёж сезиши ойдин бўлиб қолди. Аморим бошчилигида «Юнайтед» охирги икки ўйинни бой берди. Дерби «Этиҳад»да бўлиши, кейинга ҳафта эса Лига кубоги доирасида «Тоттенҳэм» майдонига сафар кутиб турганини эътиборга олсак, муваффақиятсиз серия яна давом этиши эҳтимоли ҳам юқори.
Ўзига яраша қизиқ ҳолат. «Манчестер Сити» ўтган мавсум чемпиони, Европанинг энг яхши жамоаларидан бири. Аммо айни пайтда Гвардиола жамоаси учун мунтазам ишлайдиган ва очколар келтирадиган тизим топишга қийналмоқда. «Юнайтед»нинг янги мураббий билан туб потенциали ҳам, юқориси ҳам номаълум – қайси футболчидан нимани кутиш номаълум. Жамоа «Арсенал»га қарши сафар ўйинида анча тартибли ўйин намойиш қилиб, қайсидир маънода мезбонларни чеклай олган бўлишса-да, шундан сўнг «МЮ» икки мағлубиятга учради – руҳий ҳолат «Эмирейтс»даги қадар хотиржам бўлмаслиги мумкин. Айниқса, «Олд Траффорд»да «Ноттиннҳем Форест»дан қабул қилинган мағлубият жуда оғриқли зарба бўлганини таъкидлаш лозим. Қисқа қилиб айтганда, ҳар икки жамоа ҳам ушбу ўйин учун ниманидир ўзгартиришга мухтож. Қайси мураббийнинг режаси муваффақиятлироқ бўлади, кўрамиз.
Ўзаро ўйинларга келсак, табиийки, «Сити»нинг устунлиги шубҳасиз. Чемпионатдаги сўнгги 6 ўйиндан бештасида Гвардиола шогирдлари уч очко эгасига айланишган. Аммо охирги икки дерби вазиятни бироз яқинлаштиргандек. Ўтган мавсум охирида бўлиб ўтган Англия кубоги финалида «қизиллар» 2:1 ҳисобида устун келган бўлишса, Суперкубок учун баҳснинг охирги дақиқаларидагина «Сити» ҳисобни тенглаштириб, пеналтилар сериясида совринни илиб кетганди.
«Манчестер Сити»да таркиб бўйича йўқотишлар кўпроқ. Гвардиола айниқса ҳимоя чизиғида муаммоларга дуч келмоқда. Аке, Аканжи ва Стоунз жамоага ёрдам бера олишмайди. Ковачич ҳам жароҳатланган. Ҳам қанотни, ҳам таянч зонасини ёпиши мумкин бўлган Рико Люис эса «Кристал Пэлас»га қарши ўйинда майдондан четлатилганди. Аморимга доимгидек Люк Шоу ёрдам бера олмайди. Жонни Эванс эса машғулотларга қайтганини мураббий матбуот анжуманида маълум қилди. Меҳмонлар сафида расман жароҳатланганлар сони кам бўлса-да, бир қатор футболчилар узоқ муддатли жароҳатлардан эндигина тикланишди ва етарли даражада яхши спорт формасида эмас.
ЛАЦИО – ИНТЕР (17 декабрга ўтар кечаси, 00:45)
А Серия турнир жадвали юқорисидаги айни пайтдаги тиғизликка ҳар қандай чемпионат хавас қилиши мумкин. Қаранг, «Аталанта» 34 очко билан якка пешқадам, аммо 3-4 ўринларда бораётган «Интер» ва «Фиорентина» бир ўйин кам ўтказган ҳолда 31 очкога эгалар. Бу жамоаларнинг ўзаро ўйини қолдирилганини эсласак, бу ўйин ғолиби пешқадамликда «Аталанта»га шерик бўлиши мумкин. Бундан ташқари, 2-ўриндаги «Наполи»да 32, бешинчи ўриндаги «Лацио»да эса 31 очко мавжуд.
Албатта, бундай интриганинг асосий «ҳомийси» – «Лацио». Марко Барони шогирдлари «Наполи»ни аввал мамлакат кубогидан чиқариб юборган бўлса, охирги турда энди чемпионатда ҳам Конте жамоаси устидан ғалаба қозониб, жадвалда олдинлаб кетишига йўл қўйишмади. Охирги 12 ўйинда атиги бир ўйинда мағлубиятга учраган римликлар нафақат «А Серия»да пешқадамлар сафига қўшилиб олишди, Европа Лигаси умумий жадвалида ҳам пешқадамлик қилишмоқда. Шунингдек, «Лацио» чемпионатда уч ўйинларини энг яхши ўтказаётган жамоа саналади – 7 ўйинда атиги бир дуранг, қолган барчаси ғалаба. Албатта, шу ўринда «Интер»нинг ҳам ҳали сафар ўйинларида мағлубиятга учрамаганини ҳам таъкидлаб ўтиш керак.
Ўзаро ўйинларга келсак, охирги ўйинларда деярли тенгликни кўришимиз мумкин. «Интер» қаторасига бир неча йиллардан буён фақат чемпионлик учун курашмоқда, икки марта чемпион ҳам бўлди, аммо энг яхши натижаси Чемпионлар Лигаси йўлланмаси бўлган «Лацио» билан мана шундай тенглик сақланиб қолаётгани, албатта, римликларнинг ютуғи. Охирги 30 ўйиндан 14 тасида «Интер»нинг қўли баланд келган бўлса, 12 ўйинда «Лацио» майдонни ғолиб ўлароқ тарк этган. Ўтган мавсумда Римда бўлиб ўтган учрашувда меҳмонлар ғалаба қозонган бўлишса, Миланда дуранг қайд этилганди. Шунингдек, январ ойида бўлиб ўтган Суперкубок учун баҳсда ҳам «Интер» 3:0 ҳисобида зафар қучган.
Таркибдаги йўқотишларга тўхталадиган бўлсак, «Лацио» сафида тиззасидан жароҳат олиб январгача сафдан чиққан Алессио Романиолидан ташқари, Валентин Кастелянос сариқ карточкалари кўпайиб кетгани туфайли дисквалификацияси бор. Меҳмонлар сафида эса Павар, Ачерби, ҳамда Ди Женнароларда жароҳатлар бўлиб, барчаси ой охирларида машғулотларга қайтишади.
Хуллас, ғолибни чемпионлик пойгасида фаол равишда иштирок этиш учун имкониятга эга қилса, мағлубиятга учраган жамоа пешқадамлардан бироз ортда қолиб кетади. Яна бир ўзига хос интрига, албатта, меҳмонлар устози Симоне Индзагининг бир вақтлар футболчи сифатида узоқ йиллар тўп сурган жамоасига қарши навбатдаги маротада қарши келишидир.
