15 декабр, шанбадан якшанбага ўтар кечаси Монте-Карлода профессионал бокс кечаси ўтказилиб, оқшомнинг марказий жанги ўзбекистонлик боксчи Муроджон Аҳмадалиев иштирокида ўтди.
Профессионал бокснинг ярим енгил вазн тоифасида собиқ жаҳон чемпиони, 30 ёшли Муроджон Аҳмадалиев (12-1, 9 КО) мексикалик 27 ёшли Рикардо Эспиноса Франкога (30-4, 25 КО) қарши рингга кўтарилди. 12 раундга белгиланган жангда WBA Interim (вақтинча) чемпионлик камари тикилган эди.
Жангни шиддатли бошлаган Муроджон 3-раунддаёқ рақибини рингга қулатди. Ушбу раундда Эспиносани икки марта нокдаун ҳолатига туширган ўзбек боксчиси 3-марта рақибини рингга йиқитгач, рефери техник нокаут қайд этиб, жангни тўхтатди. Натижада, Аҳмадалиев WBA Interim камари соҳибига айланди.
Жангдан кейин ўзбекистонлик боксчи 2025 йилда япониялик мутлақ жаҳон чемпиони Наои Иноуэга қарши рингга чиқишни кутаётганини айтди. Аҳмадалиев Наоидан камар соҳиблиги йўқотишдан қўрқмаса, у билан жангга чиқишга тайёрлигини маълум қилди.
Иноуэ чемпионлик унвонини 24 январь куни IBF`нинг мажбурий рақиби Сем Гудманга қарши ҳимоя қилади.
Наои Иноуэ супер вазн тоифасида амалдаги мутлақ жаҳон чемпиони, тўртта вазн тоифасини забт этишга муваффақ бўлган ва ҳеч қачон мағлуб бўлмаган боксчи ҳисобланади. Япониялик боксчи Жаҳон бокс кенгаши (WBC), Бутунжаҳон бокс ташкилоти (WBО), Халқаро бокс федерацияси (IBF) ва Бутунжаҳон бокс ассоциацияси (WBА) чемпионлик унвонларига эга.
