Деновда кўприк очилишига бағишланган тадбирга юпун кийимдаги ўқувчилар жалб қилинди

Аниқланишича, ўқувчилар тадбирда вилоят Маданият бошқармасининг топшириғи билан енгил кийимда қатнашган. Болалар омбудсмани тақдимномасига кўра, болалар соғлигини хавф остига қўйган масъуллар интизомий жазога тортилган.

Ижтимоий тармоқларда Сурхондарё вилоятида ўқувчилар юпун кийимда тадбирга жалб этилган акс этган видео тарқалди. Болалар омбудсмани мазкур ҳолат бўйича ўрганиш ишларини олиб борди.

Аниқланишича, 6 декабр куни Денов тумани ҳудудидан ўтган автомобил йўли билан боғловчи темирйўл устидан ўтган кўприк фойдаланишга топширилган. Кўприкнинг очилиш маросимига совуқ об-ҳавода Денов туманидаги 14 ва 16-сонли мусиқа мактабларининг ўқувчилари (16 нафар қиз ҳамда 4 нафар ўғил бола) туманнинг Маданият бошқармаси топшириғига кўра енгил байрамона кийимларни кийган ҳолда жалб қилинган.

Сурхондарё вилояти ҳокимлиги томонидан эълон қилинган мазкур тадбир суратларидан кўриш мумкинки, унда иштирок этган вилоят ҳокими Улуғбек Қосимов ҳамда вилоят фаолларининг барчаси қалин кийимда бўлган.

Ҳолат юзасидан Болалар омбудсмани Маданият вазирлигига болаларнинг соғлигини хавф остига қўйган масъулларга тегишли чора кўриш ва бундай ҳолатларга йўл қўймаслик юзасидан тақдимнома киритган.

Тақдимнома Маданият вазирлиги томонидан ўрганиб чиқилиб, болаларнинг соғлиги хавф остига қўйилгани юзасидан ҳудуднинг тегишли мансабдор шахсларига нисбатан интизомий жазо қўлланган.

«Шунингдек, вазирлик тасарруфидаги ташкилотларга юқорида қайд этилган қонунбузилиш ҳолатларига такроран йўл қўймаслик, ўқувчиларни ҳар қандай тадбирларга асоссиз жалб қилишни қатъиян тақиқлаш чораларини кўришга оид кўрсатмалар Маданият вазирлиги томонидан берилди. Болалар омбудсмани бола манфаатлари нуқтаи назаридан ўз кузатувини давом эттиради», — дейилади хабарда.

#Сурхондарё #ўқувчилар #болалар омбудсмани