Чирчиқ шаҳридаги дорихонада босқинчилик содир этилди

Ижтимоий тармоқларда бир шахс дорихонага пичоқ кўтариб кириб, сотувчидан пул талаб қилгани акс этган видеолавҳа тарқалди. “Миллар” информацион дастурида маълум қилинишича, ҳолат Тошкент вилоятининг Чирчиқ шаҳридаги дорихоналардан бирида содир бўлган.   

Қайд этилишича, воқеа 13 январ куни соат тахминан 23:05 лар атрофида содир этилган.   

“Ҳар кунлик иш фаолиятимни олиб бораётгандим. Соат 23:00да дорихонани ёпиб, кассанинг олдига келганимда нотаниш шахс дорихонага бостириб кирди. Сўнгра қаршилик қилишимга қарамасдан пичоқ билан таҳдид қилиб, кассадан тахминан 700 минг сўм атрофидаги пулни олиб кетди”, деган дорихона сотувчиси.

Шундан сўнг сотувчи “102”га қўнғироқ қилган ва воқеа жойига тезкор ходимлар етиб боришган. Ҳолат юзасидан Чирчиқ шаҳар ИИБ ходимлари томонидан олиб борилган тезкор-қидирув тадбирлари натижасида гумонланувчи, 1993 йилда туғилган шахс шу куннинг ўзида аниқланиб, процессуал тартибда қўлга олинган.  

Йигит ўша вақтда спиртли ичимлик таъсирида бўлганини, нима иш қилиб қўйганини билмай қолганини билдирган. 

Ҳолат юзасидан Жиноят кодексининг 164-моддаси 2-қисми “а” банди (қурол ёки қурол сифатида фойдаланиш мумкин бўлган бошқа нарсаларни ишлатиб босқинчилик содир қилиш, 8 йилдан 10 йилгача озодликдан маҳрум қилиш билан жазоланади) билан жиноят иши қўзғатилган. Ҳозирда тергов ҳаракатлари олиб борилмоқда.