АҚШнинг бўлажак молия вазири Россияга қарши санкцияларни кучайтиришга ваъда берди

АҚШ молия вазири лавозимига номзод Скотт Бессент Россияга қарши нефт бўйича санкцияларни кучайтиришга чақирди. Бу ҳақда у 16 январ, пайшанба куни АҚШ Сенати молия қўмитасининг эшитувларида айтиб ўтди. Тадбир Associated Press (AP) томонидан трансляция қилинди.

Сенатор-демократ Уорнер: «Биз етарлича иш қилмадик»

Россия ва Украинага нисбатан сиёсат масаласини сенатор-демократ Марк Уорнер кўтарди. «Мен шуни ҳис қиляпманки, биз Владимир Путинга Украинадаги тажовузкор ва даҳшатли хатти-ҳаракатлари учун муносиб жавоб бера олмаймиз», деб шикоят қилди қонун чиқарувчи.

«Биз етарлича иш қилганимиз йўқ. Очиғини айтганда, санкциялар режими, менимча, керак бўлган даражада самарали бўлмади. Байден маъмурияти нефт ва танкерларга қўшимча санкцияларни жорий этишда жуда кеч қолди, деб ўйлайман», дея қўшимча қилди Уорнер. У Бессент санкциялар режимини янада кучайтиришни режалаштиряптими ёки йўқми, шу ҳақда сўради.

Бессент "Газпром нефт" ва "Сургутнефтегаз"га қарши санкциялар ҳақида

«Украинада содир бўлаётган фожиа онгли ҳаётимдаги энг катта фожиалардан биридир. Мен молия вазири этиб тайинлансам, уни тезроқ тугатишни хоҳлайман», деб жавоб берди Бессент.

10 январ куни «Газпром нефт», «Сургутнефтегаз» ва бошқа ўнлаб Россия нефт хизматлари кўрсатувчи компаниялари, трейдерлар ва танкерларга нисбатан жорий қилинган АҚШ санкцияларини шарҳлар экан, Бессент шундай деди: «Оқ уйнинг миллий хавфсизлик бўйича маслаҳатчиси Жейк Салливан кетишидан бир неча кун олдин Россия нефт компанияларига қарши санкцияларни кучайтирганини кўриб ҳайрон бўлдим. Ҳақиқатан ҳам, бу ойда АҚШда нефть нархи 9 фоизга ошди».

Бессентнинг сўзларига кўра, яқин вақтгача АҚШнинг Россия нефт секторига қарши санкциялари жуда заиф эди, чунки Байден маъмурияти, айниқса, АҚШдаги сайлов арафасида Россиядан экспорт камайса, жаҳон бозорида ва АҚШнинг ўзида нефт нархи ошишидан хавотирда бўлган. Шу билан бирга, демократлар маҳаллий нефт ишлаб чиқаришни чекладилар, дея таъкидлади молия вазири лавозимига номзод. Унинг ишонч билдиришича, АҚШда қазиб олиш ҳажмининг ошиши Россия нефт компанияларига нисбатан санкцияларни кучайтириш имконини беради.