Кучли бешликда кичик танаффуслар, турли даражадаги кубок ва суперкубок ўйинларидан сўнг, асосий турнир – чемпионатлар учун қизғин палла бошланмоқда. «Ювентус»нинг мағлубиятсиз сериясига «Милан» чек қўя оладими? Эмери яна «Арсенал»ни чалиб қолишга қодирми? «Манчестер Юнайтед» АПЛ ушбу мавсумида қаторасига икки ғалабага эришишни ниҳоят эплай оладими? Конте пешқадамликни мустаҳкамлай оладими? Ушбу дам олиш кунларидаги ўйинларни томоша қилиб жуда кўп саволларга жавоб топиш мумкин.
ЮВЕНТУС – МИЛАН (18 январ, 22:00)
«Ювентус» сўнгги А Сериядаги сўнгги уч ўйинини ҳам дуранг билан якунлади ва чемпионатдаги дуранглар сонини 13 тага етказди. Кучли бешликда «ПСЖ» билан биргаликда ҳалигача мағлубият нималигини билмай келаётган туринликлар чемпионлик кураши тугул, ҳатто кучли тўртликда ҳам эмаслар. Ҳаммаси шу дуранглар сабабли. Бундай муаммо қайсидир маънода «Милан»да ҳам бор. Миланликлар барча мусобақаларда 8 ўйиндани бери мағлубиятга учрамай келаётган бўлишса-да, кераксиз дуранглар ҳам кўпайиб кетяпти. Жумладан, «Женоа», «Рома» ва «Кальяри» билан ўз майдонидаги дуранглар, албатта, мухлислар томонидан кутилмаганди.
Яхши гаплар ҳам бор. «Рома» билан ўйинда Фонсека ҳакам томонидан майдондан четлатилгач, ўша қизил карточка мураббийни нафақат ўйиндан, бутунлай «Милан»дан четлатган бўлиб чиқди. Сержиу Консейсау янги мураббий этиб тайинлангач эса «Милан» кутилмаганда мамлакат суперкубогини қўлга киритди. Ушбу мусобақа яримфиналида айнан «Ювентус» устидан иродали ғалаба қозонилганини ҳам таъкидлаш керак. Қизиғи, Консейсау қўл остида миланликлар 3 та ғалабага эришган бўлса, учаласи ҳам ҳисобда орқада бўлиб туриб қўлга киритилди. Иродани намойиш қилиш яхши, аммо бошқа томондан бу ҳолатга ижобий баҳо бериб ҳам бўлмайди. Демак ҳали ўйинларга тайёргарлик, тактика борасида жамоа тўлиқ ўзгармаган, шунчаки Консейсаунинг харизмаси, шогирдларини эмоционал томондан тўғри йўналтира олаётгани, сўнгги дақиқаларгача курашиш, ўзига ишонч катта экани сабабли якунда бурилиш ясай олишмоқда. Бундан келиб чиқсак, навбатдаги ўйин ҳам «Милан»нинг бугунги ҳолати, балки келажаги ҳақида ҳам кўпроқ маълумотга эга бўлишимиз учун замин яратади.
Ўзаро ўйинларга қарасак, қизиқ фактлар ўртага чиқади. Масалан, «Ювентус» беш ўйиндан бери ўз майдонида «Милан»ни юта олмай келмоқда. 2019 йилда «Ювентус» Дибаланинг голи ёрдамида «Милан»ни 1:0 ҳисобида мағлуб этганида, бу мезбонлар учун азалий рақиби устидан қаторасига тўққизинчи ғалабаси эди. Аммо шундан сўнг устунлик қизил-қоралар томонига ўтди. Туринда «Ювентус» юта олмай келяпти. Тўғри, шу оралиқда Миланда кечган ўйинларда икки марта «Ювентус» ғалаба қозонганини ҳам айтиб ўтиш керак.
Таркибларга келсак, афсуски Чико Консейсаунинг жароҳати яна бир яхши интригадан маҳрум қилади. Унинг «Ювентус» таркибида отасининг жамоасига қарши қандай ўйин кўрсатиши чиндан ҳам жуда қизиқ бўларди. Мезбонлар таркибида бошқа йўқотишлар йўқ, зеро Милик, Бремер каби футболчилар мавсум охиригача ўйнай олмасликлари маълум. Меҳмонлар сафида йўқотишлар кўпроқ – Пулишич, Флоренци, Чуквезе, Лофтус Чик каби футболчилар шерикларига ёрдам бера олишмайди. Алваро Мората эса «Комо»га қарши ўйинда сариқ карточка олди ва бу футболчининг дисквалификациясига сабаб бўладиган сўнгги огоҳлантириш эди.
Мавзуга оид
АРСЕНАЛ – АСТОН ВИЛЛА (18 январ, 22:30)
Фото: Getty Images
Айтиш мумкинки, «Арсенал» учун янги йил яхши бошланмади. Аввалига Лига кубоги яримфиналидаги биринчи ўйинида ўз майдонида «Нюкасл»га 0:2 ҳисобида, кейин Англия кубогида «МЮ»дан пеналтилар сериясида мағлуб бўлишгач, жамоанинг ушбу мавсумда ҳам соврин ютиш имконияти кескин пасайиб кетди. Олдинда фақат «Арсенал» ўз тарихида ютмаган Чемпионлар Лигаси, ҳамда анча олдинлаб кетган «Ливерпул»и бўлган АПЛ қолди холос. Албатта, ўзининг бешинчи тўлақонли мавсумида Артетага босим ошиб бораётгани, энди шунчаки совринлар учун кураш эмас, мухлисларга ғалаба ҳам кераклигини тушуниш керак. Бунинг устига пешқадам «Ливерпул» экани кўпроқ алам қилади. Чунки «Манчестер Сити»нинг гегемонлиги тушунарли, «Арсенал» камроқ имкониятлар ва таркиб билан Гвардиола жамоасидан устун бўлиши қийинроқ ва ҳамма учун тушунарли бўларди. Аммо камроқ пул сарфлаган, мураббийини ўзгартирган ва ёзда бирорта ҳам футболчи сотиб олмаган «Ливерпул» чемпионликни илиб кетса, Артетага саволлар кўпайиб кетиши шубҳасиз.
Яна бир ачинарли ҳолат Габриел Жезуснинг жароҳатидир. Сака жароҳат олгач, бразилиялик ҳужумчи «Арсенал» олдинги чизиғида етишмаётган тезкорлик ва фаолликни бера олган ва беш ўйинда 6 гол уриб, айнан керакли вақтда юқори спорт формасини намойиш қилаётганди. Мартинелли, Хаверц, Эдегор каби футболчилар кўпроқ очиқ тўпларда самарали, Жезус эса яккакурашларда ва прессингдаги фаоллиги туфайли рақибларга ноқулайлик туғдира олаётганди. «МЮ»га қарши ўйинда Жезус жароҳат олди ва мавсум охиригача сафга қайта олмаслиги маълум бўлди. Артета вазиятни ўнглаш мақсадида клуб трансфер бозорига чиқиши мумкинлигини ҳам яширмади. Тилга олинган Сака ва Жезусдан ташқари, мезбонлар таркибида Нваниери, Уайт ва Калафиорилар ҳам майдонга туша олмайдилар. «Астон Вилла» сафида эса Пау Торрес ва Жон Макгинларда кичик жароҳатлар бор.
Фақат ёмон томонларни айтдик, аммо фақат АПЛ назарда тутилганда, чемпионлик пойгасида аксинча, охирги турда «Арсенал»да яна пойгада яқинлашиш учун имконият пайдо бўлди. «Ливерпул» қаторасига «МЮ» ва «Ноттингҳэм» билан дуранг ўйнади, «Арсенал» эса шимолий Лондон дербисида «Тоттенҳэм»дан уч очко олишга эришди. Айни пайтда йўқотилган очколар бўйича орадаги фарқ 4 очкога айлангани «Арсенал»га умид беради. «Ливерпул» бу турда қийин Брентфордга сафар қилишини инобатга олсак бу фарқ янада қисқариши мумкин. Ҳозир шундай паллаки, «Арсенал» умуман очко йўқотишга ҳаққи йўқ ва пешқадамга босим қилишда давом этиш лозим. Агар шу паллада «Арсенал» ҳам очко йўқотишни бошласа, «Ливерпул»га хотиржамлик қайтади ва февралдан кейин фарқни қисқартириш ниҳоятда мушкул вазифага айланади.
Рақибга келадиган бўлсак, «Астон Вилла» сўнгги йилларда, хусусан Эмери бошқарувига ўтгандан кейин «Арсенал» учун энг ноқулай рақиблардан бирига айланиб қолган. Эмери ва Артатенинг илк дуэлида бирминҳэмликлар аввал ҳисобда олдинда борган, кейин сўнгги дақиқаларгача дурангни сақлаб турган, аммо ҳакам томонидан қўшилган дақиқалардагина «Арсенал» икки гол уриб, 4:2 ҳисобида ғалабага эришганди. Аммо ўтган мавсумда ҳар икки ўйинда ҳам «Астон Вилла» бирорта ҳам гол ўтказмай ғалаба қозонди. Айниқса, апрел ойида Лондонда бўлиб ўтган ўйин мезбонларнинг эсидан чиқмаса керак. Айнан ўша ўйиндаги 0:2 ҳисобидаги мағлубият амалда «Арсенал»нинг чемпионлик имкониятларини кескин тушириб юборганди.
АТАЛАНТА – НАПОЛИ (19 январга ўтар кечаси, 00:45)
Қаторасига беш ўйиндаги ғалабасидан сўнг «Наполи» биринчи ўринга қайтди. Бу орада узоқ вақт ғалабали серия қайд этган «Аталанта» А Сериядаги охирги уч ўйинини дуранг билан якунлаган бўлса, Суперкубок учун баҳсларда «Милан»га ютқазди. Мана шу ерда Конте жамоасининг нега Италия чемпионлиги учун кўпроқ фаворит экани англашилса керак.
«Наполи» янги мураббий Антонио Конте учун жуда қулай режимда. Сабаби, жамоа ўтган йили Италияда жуда пастки ўринларни олди ва ҳеч қандай еврокубокларда қатнашмайди. Биз биламизки, Конте футболи ижрочилардан кўпроқ югуриш, жисмоний ҳаракатлар талаб қилади. Ҳар уч кунда ўйналганда эса, биринчидан футболчилар бу юклама учун чарчаб қолишади, иккинчидан жароҳатлар кўпайиб кетади. «Наполи» Италияда юқори ўринлар учун курашаётган жамоалар ичида бошқа фронтда кураш олиб бормаётган ягона жамоадир. Ҳатто Италия кубогидан ҳам «Лацио»дан ютқазиб, чиқиб кетди. «Аталанта»нинг Чемпионлар Лигасида ва Италия суперкубогида иштирок этганини эътиборга олсак, бугунгача «Наполи»дан 8 ўйин кўп ўйнаган. Бу дегани саккиз ҳафта турлар орасида қўшимча ўйинларда майдонга тушилди, дейилганидир. Табиийки, бу чемпионлик пойгасида ноқулайлик туғдиради ва бундай устунликдан фойдаланишда Антонио Контенинг олдига тушадигани йўқ.
Бундай режим «Наполи» фойдасига ишлаётганини таркибда жароҳатланганлар умуман йўқлиги билан ҳам сезиш мумкин. Ягона йўқотиш Хвичанинг «ПСЖ»га трансфер қилинганидир. Албатта, охирги ўйинларда грузиялик футболчи майдонга тушмаётганди, аммо «Наполи « ҳали унинг ўрнига футболчи сотиб олмаганини ҳам таъкидлаш керак. «Аталанта» таркибида эса Куадрадо, Коссуну ва Скамаккада жароҳатлар бор. Колашинац эса сариқ карточкалари сони дисквалификация учун етиб қолгани туфайли ушбу учрашувни ўтказиб юборади.
Ўзаро ўйинларга келсак, сўнгги йилларда мутлақо тенгликни кўриш мумкин. Сўнгги 30 ўйинни олсак, «Аталанта» ҳам, «Наполи»да ҳам 13 тадан ғалаба бор. Тўрт ўйин дуранг билан тугаган. Лекин охирги икки ўйинда «Аталанта» Неаполда ғалаба қозонганини ҳам таъкидлаш керак. Ҳар икки ўйинда меҳмонлар йирик – 0:3 ҳисобини қайд этган. Аммо яна бир қизиқ тарафи, Бергамодаги ўйинларда ҳам меҳмонлар учун ижобий анъана ҳам бор – «Наполи» «Аталанта» майдонида охирги уч ўйинни ўз фойдасига ҳал қилиб келмоқда. Айни пайтда жамоалар ўртасидаги фарқ 4 очкони ташкил қилмоқда, демак агар «Аталанта» устун келадиган бўлса орадаги фарқ минималгача қисқаради. Бу эса йўқотилган очколар бўйича «Наполи» билан тенг кўрсаткичда бўлган «Интер» учун айни муддао бўларди.
МАНЧЕСТЕР ЮНАЙТЕД – БРАЙТОН (19 январ, 19:00)
Фото: Getty Images
«Манчестер Юнайтед» энг қийин рақибларга қарши сафар ўйинларида имтиҳондан яхши ўтгач, яъни «Энфилд»да очко олиб, «Эмирейтс»да «Арсенал»ни кубокдан чиқариб юборгач, ниҳоят Аморим жамоаси ўз йўлини топгани ҳақида эътирофлар кўпайиб кетганди. «Саутҳэмптон» билан ўйиндан олдинги матбуот анжуманида Рубен Аморим бу ҳолатга тўғри ёндашди – «кучли рақибларга қарши ўйинларда вазифамиз осонроқ эди, биз ўз имкониятимизни кутдик холос, аслида ҳақиқий кучимиз кейинги ўйинларда, биздан ҳамма ғалаба кутаётган паллада кўринади» – деди португалиялик мураббий. Бу аслида жуда тўғри баҳо бўлганини «Олд Траффорд»даги аутсайдерга қарши ўйин кўрсатиб ҳам берди. Меҳмонлар ўйиннинг катта қисмида яққол устунлик қилишди, кўп вазиятлар яратиб, ҳисобда олдинда ҳам боришганди. Фақат таркибдаги баъзи ўзгаришлар ва албатта, Амад Диаллонинг қаҳрамонлиги якунда «МЮ»га қимматли ғалабани олиб келди холос. Бу жамоанинг охирги етти ўйиндаги илк ғалабаси бўлганини ҳам таъкидлаш керак.
Демак ўша ўйиндан кейин хавотирлар ҳеч қаерга кетмагани аниқлашди. «Брайтон» ўйин шакли ва ижрочилар борасида «Саутҳэмптон»дан анча кучли бўлган рақиб ҳисобланади. Хўш, Аморим аввалги ўйиндан келиб чиқиб, яна ҳимоявийроқ вариантни танлайдими ёки ўзи таъкидлаганидек, қийинчилик туғдираётган юқори прессингдан воз кечмайдими? Бир қатор жароҳатланган футболчилар қайтгач, «Брайтон» анча ишончли ўйнаяпти. Жамоа олти ўйиндан бери мағлубиятга учрагани йўқ, охирги икки ўйинда гол ўтказмай ғалаба қозонишга муваффақ бўлди. Ундан олдин сафарда «Астон Вилла» билан, ўз уйида «Арсенал» билан дурангга эришилгани «Брайтон» осон рақиб бўлмаслигидан далолат беради. Айниқса, «Арсенал» билан ўйинда жамоа анча ишончли ва ташаббускор ўйин кўрсатганди.
Айнан «Брайтон» каби рақиблар, айниқса ўйин «Олд Траффорд»да бўлса, Аморим учун энг ноқулай ҳисобланади. Сабаби, мураббийнинг ўзи тан олганидек, айни пайтда жамоада тўпни назорат қилиш ва прессинг бўйича муаммолар мавжуд. «Арсенал» ёки «Ливерпул»га қарши ўйинларда «МЮ» тўпни назорат қилишга ҳам, прессингга ҳам мажбур эмас, ҳимоявий услуб ҳеч ким томонидан танқид остига ҳам олинмайди. Футболчиларнинг онгостида ҳам жамоа тўғри ўйнаётгандек тасаввур бўлади ва ўз вазифасини тўғри бажаришга асос бўлади. «Брайтон» билан ўз майдонида ўйнаганда эса жамоадан фақат ғалаба кутишгани туфайли, футболчилар олдинга боришга, тўпга эгалик қилиш учун курашишга мажбур. Бу паллада эса рақиб жазолайди, «МЮ»нинг камчиликлари ўртага чиқа бошлайди. Аввалроқ «Нюкасл», «Ноттингэм» ва «Борнмут» каби ўзига яраша тартибли ва шаклланган футболига эга бўлган жамоаларнинг «Олд Траффорд»да ғалаба қозониши замирида айнан шу нарса ётган бўлса ажаб эмас. «Саутҳемптон»ки шу даражада ўйин кўрсатиб, ғалабага яқин келди, «Брайтон»дан ҳар нарсани кутиш мумкин. Бунинг устига «Брайтон» анъанавий равишда «Олд Траффорд»да ўзини яхши ҳис қилишини, ўтган икки ўйинида ғалаба қозониб кетганини ҳам унутмаслик керак. Умуман тен Ҳаг учун «Брайтон» энг ноқулай рақиб бўлганди – ўтган беш ўйиннинг тўрттасида «МЮ»ни мағлуб этган.
Жароҳатларга келсак, мезбонлар сафида Шоу машғулотларга қайта бошлаган бўлса-да, ўйнашга тайёр эмас. Маунт, Эванс ва Линделофлар ҳам майдонга туша олишмайди. «Брайтон»да Фергюсон, Кадиўғли, Милнер, Уиффер ва Игорлар шерикларига ёрдам бера олишмайди. Аммо айтиш керакки, ҳар икки томондан саналган барча футболчилар етакчи ёки асосий таркибнинг алмаштириб бўлмас вакили саналишмайди. Яъни ҳар икки мураббийда ўзининг энг кучли таркибини тушириш имконияти бор.
